Lungphun Hmai Ah Pura An Sak! Lungphun Catial An Thleng!

Catialtu: Jacob R. Thang 

Kawl Miphunpi Thladem Tangah A Lang Tilomi Pinlung Independence Lungphun

(ဗမာလူမျိုးကြီးဝါဒအရိပ်အောက်၌ ပျောက်ကွယ်နေသော သမိုင်းဝင် ပင်လုံကျောက်တိုင်)

Lungphun hmai ah Pura an sak! Lungphun Catial an thleng!

===============================

Rolingmi Pinlung lungphun cu Buddhist Pura (pagoda) nih a phenh caah a lang ti lo. Cuhlan ahcun Pinlung khuachung vailampi in fiangpup in a rak lang nain, atu ahcun hmuh khawh asi ti lo. Aruang cu Lungphun hmai ah Buddhist Pura ngan taktak mi an sak caah asi. Pinlung lungphun hi Kawl nih an sunhsak tuk mi asi lem lo. Pinlung khua ah Buddhist pura saknak ding vawlei lawng hi a tampi ko nain Pinlung lungphun umnak thengtheng ah an sakmi cu Buddhist a simi an mah Shan miphun hrinhrim zong an lung a tling ve lo. Pinlung lungphun hi a san ah Pee 31 lawng asi. A hmai an sakmi Buddhist pura cu Pee 135 a san caah lungphun cu pura a phenh dih i zeiti hmanh in a lang kho ti lo. Cu pura cu Gen. Than Shwe order in Gen. Khin Ngunt hruainak in 2002 ah sak hram an thok i, 2006 ah an lim. Mah hicu Bama Miphunpi Lungput (ဗမာလူမျိုးကြီးဝါဒ) asi tiah Shan Women Action nih statement an thanh. Pinlung lungphun ah hin Aungsan Su Kyi cu 2000 ah voikhat te a rak ra bal i a mui a lang ve ti lo. Khin Ngunt a ra i pura a sak, cun a mui a lang ti lo. Mizei Kawl uktu bawi hmanh pinlung lungphun sunhsak in a ra mi an um tilonak cu kum tantuk asi cang tiah a hmun ummi Shan PaOo pawl nih an chim ve.

Pinlung Lungphun i Catial cu Kawl nih an remh than. Pinlung sachuk an tuahnak zawn te Pinlung khua ah lungphun pakhat cu an rak dirh. Atu i lungphun khi a rak si lo. Aungsan nih Pasahpala fund chungin 1000 a rak hlu hna i, lailei lungphun bantukin lung tlap te an rak phun. Atu i aummi lungphun hi 1951 Jan 15 ah Pinlung khuabawi San Mya nih a thar in a sakmi asi. Phaisa K. 4100 a dih tiah recird an chiah. Original lungphun cungah ca an rak tialmi cu

“တောင်တန်း–ပြည်မ ပူးပေါင်းဆောင်ရွက်ရေး ကဗ္မည်းကျောက်တိုင် ” TLANGCUNGMI–PIMAH (KAWL) KOMHNAK LUNGPHUN ti asi.

1972 Ne Win chan ah Lungphun catial cu an rak thleng diam. Tlangcungmi -Pimah (Kawl) timi kha PIMAH(Kawl)–TLANGCUNGMI tiin an remh. Catialnak hmanh ah TLANGCUNGMI tiin a hmasanak chiah an duh lo caah PIMAH timi KAWL tu kha a hmasa ah an tial. Tuanbia catial anthlengnak a muru cu Bama Miphunpi Ruahnak (ဗမာလူမျိုးကြီးဝါဒ) asi tiah Shan Women Action Network nih statement an chuah.

Chinram ah Pinlung lungphunpi cu Chin cozah nih sak an timh ve ti thawng kan theih. Cozah pakhat nih a tuahmi cu kanduh zong duh lo zongah an sak awk asi ve ko. Cun apoinak zong aum lem lo.

Chin NLD Cozah nih Pinlung lungphun pi cu pee zeizat san in dan an sak lai ticu thei asi rih lo. Panglong khua original cu Pee 31 asi nain Yangon ahcun pee 150 in an sak. Amah belte Lungphun cung catial tik ah Original lungphun catial ningin maw an tial lai, Kawl duhning in dah an tial lai ticu zoh an hau ko.

Shanram Taung Kyi khuapi i aummi Pinlung Lungphun catial cu SNLD le Shan Mino hruainak TLANGCUNGMI –KAWL တောင်တန်း-ပြည်မ tiah a original sining in 2020 Jan 26 ah remh than ve cang.

တောင်တန်း–ပြည်မ (original)

ပြည်မ္–တောင်တန်း (Kawl Remhmi)

Zeitindah Chin cozah nih an tial ve lai ticu mipi nih kan ngiat ko hna. Lungphun an tuah vekvek ko ahcun original sining in Chin cozah nih kan tial piak hna seh tiah ruahnak hawmh ka duh.

Ref:

Shan Women Action Network (2006)

Khin Mg Cho (Journey to Pinlung)

 102 total views,  1 views today

This function has been disabled for Chin 11 News.