Shwebo Pengah Ralhrangbu An Hrang,An Zaamnak Ah Tar 2 An Nunnak Liam August 11 in Sagaing ramthen Shwebo peng chung khua hna cu ralhrangbu le pyusawthi hna nih zarhkhat chung an luhhnawh i an tlaih hna, an velh hna ruangah a zaammi 2,000 leng an si cang tiah theih a si.
Nihin August 16 ah Rungtaw khua mi tar 2 hna cu an tlik zaamnak ah an zaw i an nunnak a liam tiah khuami pakhat nih RFA sin ah a chim. Ralhrangbu le pyusawthi phu hna cu August 11 zaanlei in Tetitaw khua phungki inn ah umhmun an khuar i pawngkam khua Nyongkaing, Minpe, Nyongpinhla, Paukchai le Rungtaw khua hna cu an duh tik caan paoh ah an luhhnawh hna.
August ni 11 in ni fatin innkip ah a kan luhhnawh, an kan check.Ramtang ah kaan zaam zongah an kan kawl thiamthiam,khua zeidah kan zaam cang lai ti zong kan hngal ti lo. Rawl zong tha thii kan ei kho lo, inn ah kan tin kho rih fawn lo, kan har ngai tiah khuami pakhat nih a chim.
Ralhrang rallokap mawtaw pakhat le pyusawthi 30 hrawng nih khuami hna hi an luhhnawh tawn mi a si i, thongtla mawtaw zong pakhat an i hruai chih peng tiah theih a si.
Atu ahcun khuachungah khuami kan um ti lo caah innchung thilri hna cu an hrawh,satil arva hna cu duh paoh in an thah, an ei.Khuami hna cu cycle le mawtaw he rianrangin an zsam khawh lo nak dingah lam hna cu an phih piak dih hna caah ke he lawng zaam a si.Furpi lio a si caah ramtangah harsatnak phunphun an tong tiah theih a si.
Shwebo hi PDF le ralhrangbu kar ah nai hrawng i kahdohnak a um pah lengmang nak peng pakhat a si.Ref; RFA
Leave a Reply