Lokdawng In Dawng Chin Ah (LOCK DOWN) Perhkawlh Thang

Lokdawng In Dawng Chin Ah(lockdown)

Kan nu hi Pathian a duh ngaimi a si. Thlacam hna a ṭhawng ngai. Youtube in phungchim ngaih hna a duh ngai fawn. Baibal ca rel zong a huam ngai rih. Pastor te le Evangelist te zikmuai hna a tlaihchan ngai. A duh phun le a huam phun belte hi kei ka duh phun le ka uar phun he aa naihte lo ngai ve. Keitu cu TV in bawlung chuih zoh ka huam. Facebook in Kawlram nainganzi keneh dawi ka huam ngai fawn. Cun, carel ka duh. Cu khawhin Kawlram caṭial thiam pawl biachim ngaih ka duh fawn(sarpe haw pwe puai timi khi). Cun, holh lo ṭhut ko i khuaruah sawhsawh zong ka huam phunah aa tel hoi.

Atulio cu thawngpang chiat lio si ngelcel kaw, bawlung chuih zoh awk a um ti lo. Kawlram nainganzi keneh dawi awk zong a um ve ti lo. Zawtnak hrirai chia nih a tlunh dih ve rua hna. TV zoh ah coronavirus kong lawngte. Facebook kau ah covid-19 kong lawngte. Viber zongah cu ṭhiamṭhiam. Zoh duh ding khi a si ti lo. Mi lung an la lo tuk palia. Mi a neng cang. Khatlei kam in, ram rum le ram ṭhangcho i minung hna thih thawng nih mi vialte lungnuam loin a kan tuah dih fawn. Mithla ṭhih in a kan ṭhih dih. Ṭih cang ahcun thinghmui hmanh minung ah an cang tawn. Vawlei cungmi vialte kha an cozah cio le kan cozah cio nih inn chungah an kan khumh dih lio a si fawn. Inn ah um lengmang cu a si i, kei ka um a har chinchin, kan nu aa manh lo chinchin ve.

Keimah hmanh thla ka cam khawh lo ka ti i, kan nu thla a cam khawhmi hi kaa lawm tuk hringhran. A dawt zong ka dawt ngaingai. Amah belte, khoimaw caan tete ah keimah a ka cenen chih tawn i, a poi pah tawn ve. Zarhpi zan hna cu kan tuah tawnmi a si ko caah ka theih thiam ngai ko. Chungkhar kan tlin lio caan hna thla kan cam lai ti zong kan tuah tawnmi a si ko i kaa ziak ngai fawn ko. Ni sawhsawh hna ah thla kan cam lai a ka ti tawn i, cucu kei ka caah a poi ngai ve tawn. Rawl kan ei lai ti i ka ei lai lo ti cu a fawite ko. Kan leng lai ti i ka huam lo ti zong a fawite fawn ko. Thla kan cam lai ti i, ka duh lo ti ding belte cu a fawi bak lomi a si ve hoi. Khoimaw caanah cam ko hme ka ti ve tawn i, kan pahnih in kan cam lai a ka ti ve tawn. Cu hnu cun cam ko hme ti zong aa ti thiam ti lo. Hon ti sual ah thlacam cu maw na duh lo tiah, a ra ṭhan dingmi biahalnak a lehding khi kaa fawih lo chinchin hnga. Khuazeimaw a hna ngam seh ti phun in ‘’Pathian a zummi na si lo maw…ziah na lau i na ṭih’’….ti sual ninglaw, atulio hi capo saih caan a si ti loh a ka ti sual lai ti ka phang ngai fawn. Zeitimaw in ti sual ninglaw a ka leh hnga dingmi a biafang pawl khi a thei dih ciami ka lo ngai hoi. Chungkhar pumhnak i Baibal ca rel tik hmanh ah “mi lungkhong pawl” hei ti hrawng le “nan sual i ngaichih cang u” hei ti hrawnghrang hna an rel te sual lai maw tiah, i phuhrung cia rumro in ka um tawn ṭheo.

Cuti i phuhrung pah bu lengmang in ka um tawn hi kan nu ceneng bia rumro lawng cun a si ve hlei lo. Facebook le Viber hrimhrim ah hi bantuk phunphai ka hmuh a tam tuk i a si pah ko. Coronavirus a pawt kaa ahkhan arti buhmi ei a ṭha ti a rak si. Mi tampi nih an ei len an ti bantuk ko. Tlawmpal ah zudin a ṭha ti a si hoi. Atu keimah ka umnak khua hna hi nikhat cu zudawr ah zu a dih bak ko rua. Dawr ngeitu hna nih hiti hin zu caw hlah ulaw, zu a dih lai lo ee tiah, thawng hna an zamh len rua. A cu chinchap ah Pathian bia a tling cang ee a timi kan um. Caan a nai tuk cang ee a timi kan um ve. Bawi Jesuh a ra ṭhan deng cang a timi kan um rih. Capo saih caan a si ti lo a timi kan um fawn. Nan lung khong ti hlah seh a timi kan um hoi. Culio ah Uisih tlang i Cung Irh pi inn hmanh lokdawng(lockdown) an tuah cang ti cu si hoi kaw, aho sual phawt awk ngaingai kan ṭha hlei rua lo.

Khrihfa ciocio kan si ko hna i, zumtu ciocio kan si ko hna nain, @Baibal a zummi le @Baibal aa zumhmi tiah, phunhnih in kan um ko rua dah ka ti tawn. Aho te cu dah Baibal a zummi an si i, aho te cu dah Baibal aa zumhmi an si ka ti hna sehlaw, Khrihfa paoh hi Baibal a zummi kan si i, mi piangthar deuh paoh hi baibal aa zumhmi an si ka hei ti ko hnga. Zei bantuk zumhnak cu dah a ṭha deuh i, zei bantuk zumhnak cu dah a ṭha lo deuh timi ka hal rih hna sehlaw, cutu cu kaa fiang hlei bak ve lo ka hei ti ko hna hnga.

Amah belte, atulio te ahhin pakhat cio kan pawngte ah kan Bawipa Jesuh Khrih rak dir tuah sehlaw, ‘’ na zumhnak a va hme hringhran dah’’ a kan timi kan tlawmte lai lo dah ka ti ko. An pawngah Uisih tlang Za Tlir um ve sehlaw, a ‘’Amen’’ tuknak ah Hong kong nu bantuk khan a thlaikalawng in aa chawk len ve men lai dah.

Perhkalh Thawng

 349 total views,  1 views today

This function has been disabled for Chin 11 News.