Lohtlau A Si Ko Cang Ne Hih! Trump Le A Hawi Le Nih Lih In Trump Dirkamh An Timh Cang

COVID-19 a tlun hlan i Trump nih Record a tuah khawmi thil pawl lawng vun i cawithlir i US economic le politics i a hmailei sining hi Trump avoihnihnak thim lawnglawng ah ai ningcang ding a si, tiin Republican pawl nih convention tuah an i tim. Biden nih cun kan economic le politics hi a chanh kho lai lo, tiin mipi an lunghrinter khawh an i zuam te lai.

Coronavirus nih American minung 175,000 hrawng a thahmi siseh, rian million tamtuk sungh a si mi kong siseh, cun nihintiang i poll an tuahmi vialte ah Trump a derthawmnak vialte cu i theihter lo riangmang in, Republicans pawl nih Trump i cuhlan i thathnemnak a chuahpimi vialte vun thlircawipiak an i tim.

Ni 4 chung convention tuah an i timhmi ah hin a Term khatnak lio i Trump thiltikhawhmi tete vun thlircawipiak i, a Term hnihnak zongah hi nak tamdeuh in rian a tuan rih lai, tiin biakamhnak tuah chap ding timhlamhnak kan ngei, tiah White House le party chung officials pawl nih an chim.

Kan hnung zarh ah khan Democratic lei nih National Convention an tuah i, Biden cu an party aiawhtu dingah le a bawmtu dingah Senator Kamala Harris cu an thim hna. Cu ti convention an tuah le cangka Republican lei nih a tu bantukin tuah colh an i timh hi a si. Democrats nih a hmasabik convention an tuahnak cu Milwaukee ah a si i, coronavirus a um caah phundang deuh tein an tuah.

Nov. 3 election hlan i poll an tuahmi ah hin kum 77 a si cangmi Biden nih kum 74 a si mi Trump cu a siak deuh. Trump hi muihnak, buainak le ningcang tein mi a zuam kho lo tu a si, tiin Biden le a Democrats hawi le nih an ti. Kannih kan sunghsakmi le phundang cio in kar kan hlannak ah hin dawtnak ai tel i, i lungrualnak zong a um, tiin an chim.

Phungning tein cawlcanghnak siseh, gun rights siseh, tax cuts siseh, America i hnon a tongmi minung hna kong chirhchan in ruahchannak thawngtha kan kalpi lai, tiin Republican lei nih an chim.

Tutan zarh chungah hin DNC ah thilsining, khat le khat i hmuhthiamlonak hei ti bantuk hi thanchoter kan duh. Thlircawi kan herh. A tha lei biaka le ruahchannak thawngpang theih kan duh, tiin White House counselor le former Trump campaign manager Kellyanne Conway nih Friday ah khan a chim.

Coronavirus hi thitha in tawlrel khawh a si rih lo caah, Trump le a party caah cun thawngtha bantuk ah a cang. Democratic nih an tuahmi convention ah khan Biden le Obama nih Trump a tuahsernak vialte cu thalo in an thangchiat.

Virus a tawlrel ning kongah mipi sinin Trump nih mithmaitha a hmu kho ruam lo. Trump le a mipi nih tutan thimnak i an tlaangtar hi thlen an i tim te lai, tiin Biden i a campaign nih an chim.

Tutan zarh chung i kan mipi hna nih Trump sinin an theih te dingmi bia le hla pawl hi lihfangfaak, a thalo taktakmi thenhmalnak, thitha in thil a tawlrel khawhmi mi vialte a tha na lo in phelhsolh a timhnak lawngte an si te lai, tiin Biden aiawh biachimtu Adrew Bates nih a chim.

Asinain Trump hmurka in American mipi nih theih an duh tuk ko nain an theih te lo dingmi cu, Coronavirus hi zeitin dah ka doh lai i ka tei khawh lai, timi kong hi a si te lai, tiin Bates nih a chim.

Live an thlah lai, White House in a si lai

Republican convention an tuah te tikah ah hin a tamdeuh hi cu live events deuh in Trump nih tuah ai tim. Democrats pawl belte nih cun coronavirus nih mipi a thlunh sual hna lai, ti an phan caah an aw tu an i tuun i cu ti cun mipi sinah video in an thlah.

Monday khin cun North Carolina lei ah Trump a vung tlawng lai. Zan chiarte pahzulh in Trump nih biachimnak a ngeihmi hi Republican le Democratic party pahnih an tuanbia chungah a um bal theng lo.

Trump le Biden an i dannak cu maktak khi a si, tiin Pennsylvania Republican Chairman Lawrence Tabas nih Sunday ah khan a chim. Trump hi a raltha, a tha a tho, a biaka a nung. Biden baichim hi cu ai hliphlau lo, thazaang a ngei lo mi ko a lo, thathawhnak a ngei lo, tiin Charlotte i conference an tuahmi i a kai lio ah Tabas nih a chim.

Tuesday ah khin Trump nupi Melania nih White House in biachimnak a ngei lai. Cun Wednesday ah khin Baltimore’s Fort McHenry in Vice President Mike Pence nih biachimnak a ngei ve te lai.

Republican party lei in thim a simi cu Thursday ah khin Trump nih cohlannak a tuah te lai. Zei party ti um lo in mipi nih an hman tawnmi inn tangah (White House South Lawn) cun amah a party mipi tor le cheng he tonnak an ngei te lai i cu lio ah cun an party aiawhtu ding i thim a si mi kha a cohlanpiak te hna lai.

“Zei kan tuah kan i theih ko, kan hlawh a thling ngaingai ko. Virus nih hna a kan hnawhtuk i si” timi le “Democratic aiawhtu pa hi ril lo in nan thongh lai” timi thil phunhnih aupi dingah Trump nih ni 4 lawng ai ngeih cang, tiin Constantin Querard nih a chim.

Biden cu ceilakin a soi

Trump nih hin a opponent (ral khat lei ah a dironhtu) hi capo awsawn in min si lo le min si lo a pek tawn. “Mi ngupa Biden” ti hna in min a pek salam tawn.

Joe Biden nih cun American nih kan tonmi harsatnak lawng a langhter. Asinain, kan limmi rian lengluang hi hun zoh hna ngat hmanh. Pulrai a tlun hlan i kan limmi rian lengluan hna kha vun zoh than hmanh u. Joe Biden nih cun American i a vanchiatnak lawng a hmuh, kannih nih cun American a lianhngannak kan hmuh, tiin Trump nih a chim.

Biden i President sii ai tlaknak vialte vun thumhthlaakpiak khawh dingah cun Republican lei nih an tuahmi convention kip ah an aw ngeih chun dihlak chuah in an doh le an tan a herh lai, tiin US center of the London School of Economics i saya a tuanmi Peter Trubowitz nih a chim.

A kum kong hi cu chimceih tuk hlah u law a tha.. Democratic constituences ah Biden a dir lo mi te he Trump le a campaign nih nan i ngiat thiam a hau. Cu ti i Biden a dertawmnak te cu ‘socialist minung a si, kan ram phung le hram caah tihnung a si’ tiin an aupi a hau, tiin Peter nih a chim.

Credit: Chelsea Bawi

 131 total views,  1 views today

This function has been disabled for Chin 11 News.