Lockdown A Dih Hnuah Pha-Te-Mah Pawl Sandah An Piah, Chungkhar Kong Ah An Buai Cang

Germany ram ah cun pulrai zawrnak ruang ah lockdown an rak tuah mi vialte cu an donghter pah dih ko cang hna nain Hamburg City chung ah Pha-te-mah pawl cu an dawr on nak nawl an pek rih hna lo caah fak piin buainak an chuah ter tiah ramchung thawngzamh nih an langhter.

Lockdown a dih hnuin thil puan dawr, rawl dawr le Bars vialte hna zong on than nak nawl an pek dih cang hna, asinain Pha-te-mah pawl hi an vei lo zuar nak ding ah nawl an pek rih hna lo ruang ah chungkhar pawcawm nak ah siseh, inn man le ei-din kong ah lungrethei ngai in an um ko hna. Germany ram ah cun Pha-te-mah pawl hi phungning tein a um ve mi an si i Tax zong felfai tein a liam ve mi an si caah an ram cozah nih theih pi mi le hna thlak pi mi an si ve hna.

Pha-te-mah pawl an umnak buiding cu on than nak nawl an pek lo mi hna ruang ah sandah piah in an au hna i “kan dawr on than nak nawl nan kan pek lo mi ruang ah ei-din ding kan i hmuh kho ti lo, chungkhar pawcawm nak a kawl cio mi kan si, cu ruang ah kan ram phung nih a onh lo mi zalam cung ah kan i zuar cang lai. Zalam cung ah kan i zuar a si ah cun pumpak ngandam nak ca zong ah tihnung deuh a si i zawtnak a ngei le ngeilo zong kan thleidang kho ti hna lai lo” tiah sandah an piah ve cang hna.

Pha-te-mah a tuan mi hna pawl hi Covid-19 ruang ah lockdown chung vialte zeibantuk bawmhnak hmanh an ram cozah nih a rak pek ve hna lo ruang ah an harsat khun nak zong hi a si.

REUTERS

 139 total views,  2 views today

This function has been disabled for Chin 11 News.