LMZ (Thantlang) Upa Sin Cakuat Ropui Taktak!

Upat awktlakmi LMZ(Thantlang) upa hna;

Hmawngtlang khuataw lam chunhnak kong he pehtlai in May 6 ; 2020 nithla in nan chuahmi caathanh(statement 1/2020)kongah Zophei mifa pakhat dirhmun in ka hmuh ning le siaherh bia vun ttial ve ka duh.Statement achuahtu LMZ Mino sin ah si loin nanmah sin ah ka rak ttialnak a ruang cu nan theih cia a si lai ka zumh.Hi kong he pehtlai in thil pahnih vun langhter ka duhmi hna cu ;

Apakhatnak ah LMZ Mino min kha ningcang loin nan hmannak(exploit)kong a si.Kalay Sianghleirun Siangngakchia hna nih Lautu;Mara;Senthang;Zophei le Zotung cu unau chuakkhat kan si caah tthatni chiatni kan ton caan ah nun i hrawm dingah le hmailei kan ram le kan miphun tthanchonak rian ah i funtom in hmunkhat teah rian kan ttuantti khawh nakhnga tiah LMSZZ tiin fellowship buu an rak dih.An rak dirh hnawhchan hi lungrualnak caah a si.Mithar donnak (fresher welcome)hna an rak tuah i Kalay Zophei upa tete zong an rak kan sawm i forhfialnak bia hna kan rak chimh ve tawn hna.Hawikomhnak caah lentecelh zuamnak hna an tuah.Sianghleirun Siangngakchia an si bantuk in miphun le ram caah tinhmi ttha tampi an ngei.Zeitindah lungrualnak in kan miphun kan tthawnter lai i kan sersiam lai ti kha an i hmaithlakmi a si.2013 kum ah ka rian ttuannak he pehtlai in Thantlang ka rak phan ve.Thantlang khua ah rak dirh cangmi LMZ cawlcanghnak ah ka ti khawh zat in thazang ka rak chuah bal ve.Thantlang ah Senthang le Zotung khuasa an um lo caah nan telh hna lo a si kho men.Atutan nan Caathanh (statement) chuahmi he pehtlai in hrihawhtu hi LMZ Mino si loin LMZ upa an si ti thawng ka theih tik ah ka lung a ttha lo ngaingai. LMSZZ nih aa tinhmi cu lungrualnak kha tthawnnak ah thlen ding asi nain nanmah nan thil tuahmi hi cu lungrual lonak le tthencheunak lei ah a pialmi tuahsernak a si kha fiang tein hmuh khawh a si.Mino min le thazang kha ningcang loin(exploitation)(ကုိယ္​က်ဳီးအတြက္​အခြင္​့အ​ေရးယူ အသုံးခ်ျခင္​း)tiin ka hmu.Cucaah hi nan tuahsernak nih hmailei kan Zophei khuatlang chungah siseh; LMSZZ cawlcanghnak ah siseh lungrualnak a hnorsuantu thil a si sual ahcun nanmah nih (တာဝန္​ယူမႈ တာဝန္​ခံမႈ)ttuanvo nan lak a hau telai ti kha a hlankan in theihter kan duh hna.

Apahnihnak ah Motor lampi kha hriamnam bantuk in nan hmannak kong a si.Nan caathanhmi pakhatnak bantuk in Hakha -Hnaring lampi siseh;Thantlang – Hnaring lampi siseh cozah nih an kan cawhpiakmi lam a si loh.Tleicia kan pa PuThla Mang(Surngen);Pu Za Khar(Hmawngtlang) le adang Zophei kan pale hrihhawhnak in mahle thazang tein rak cawhmi lampi a si.Ahnuah Cozah nih a lakmi lam a si.Hi lampi a pemh khawh nakhnga kan pale zei tluk in dah thazang an rak chuah i khuakip lungrualnak an rak ser timi hi philh awk a ttha lomi tuanbia a si.Hi lampi nih a kan cawnpiakmi cu lungrualnak cu kan tthawnnak ti hi a si.Minung tthanchonak caah Motor lam zei tluk in dah a biapi ticu chim hau loin nan theih ciomi a si.Motor lam cu khua le ram tthanchonak caah le minung tthanchonak caah kan hman a herhmi a si.Tleicia kan pale an saduhthah zong mah cu a si ve.Cozah hmanh nih khuachungah a lut cangmi Motor lam kha kan let tthan lai ti hna sehlaw ;hi kan lampi nih a rak ttialmi hnulei tuanbia kha ruah tthan buin Zophei khuatlang lungrualnak a hrawh sual nakhnga lo kan let piak hram hlah u tiah LMZ upa hna nih nan dirpi deuh awk a si hnga lo maw??.Hi lam letnak kong he pehtlai in puanzar phen ah thil tampi a um ti cu Zophei mifa hna nih kan theih dihmi a si ko.Cucaah kan tuahmi thil nih hmailei kan tefa hna caah thilttha a chuahpimi sihramseh ti saduhthahnak he …..Hrang Tum (Kalaymyo)

 980 total views,  1 views today

This function has been disabled for Chin 11 News.