Liverpool FC caah thawngchia taktak, Mane zong Covid-19 rungrul nih a tlak ve ko cang

Liverpool FC nih an i bochan taktak mi le an uar taktak mi an hmaikal Mane cu Covid-19 positive a si caah a tlawmbik zarhhnih chung hi cu bawlung puai ah ai tal kho ti lai lo. Mane hi Liverpool FC caah cun hmaikal tha taktak le goal khumh a thiam taktak ve mi a si caah an i bochan taktak mi zong a si pinah First Lineup ah an thim lengmang mi zong a si fawn.

Liverpool FC chung ah Mane hi a pahnih nak Covid-19 positive an hmuh mi zong a si i pakhat nak Covid-19 positive an hmuh mi hi Liverpool FC nih tukum ah mithar an cawk mi zong a si tiah an langhter.

Liverpool FC chung in Covid-19 positive an hmuh mi hna kong ah tuanvo ngeitu leinih an langhter mi cu “Kan player chung in positive a si mi hna hi hmundang teah chiah an si ko i tuah uh an ti mi le zulh ding an ti mi vialte cu felfai tein zulhter khawh hna zong kan i zuam ko.

A rauh hlan ah damnak an hmuh khawh nak hnga le liverpool FC caah bawlung an chuih than khawh nak hnga ding ah biatak tein zohkhanh hna kan i zuam ko” tiah zong an langhter ve ning a si.

Mane hi tukum season thar ah Liverpool FC caah puai thum a chuih manh i goal 3 zong a khumh kho mi a si caah tukum season thar ah hin cun an i bochan taktak mi zong a si. Hi tluk in an i bochan mi player tha pakhat nih puai ah a chuih pi khawh ti hna lai lo caah Liverpool FC caah cun thawngchia ngai a si ko nain an dihlak himnak caah cun hmundang teah Quarantine an chiah hi cu a herh bak mi zong a si.

Source: Akon Thi