Lentecelh Mi Hna Lakah Zohchunh Tlak Taktak Mi, Ronaldo Le John Cena

Vawlei cung lentecelhmi bawlung, basketballer, boxer le Wrestler pawl hi an taksa ah chingchiahnak tattoo dawh taktak tampi an ngei hna. Micheukhat cu an tattoo in phaisa tampi hmuhnak ah an hmang. Footballer ahcun David Beckham le Neymar hi tattoo a lar deuh tertu an si.

A sinain pro wrestler John Cena le Juventus hmaikal Cristiano Ronaldo hna cu an chuah kaa in tattoo pakhat hmanh an I tuah bel lo. An nun chung tattoo an I tuah lem lai lo dah tiah zumhnak a um. Tattoo an duh lonak a ruang an I khat ngaingai. An pahnih in hin a ho dah an si ti cu kan theih dih ko lai dah! Zohchunh tlak taktak milar an si.

Vawlei cung bawlung ah min ngei taktak Cristiano Ronaldo hi caan hman tein thisen a pe tawn I, tukum June thla world Blood Donor day ah khan cu midang caah thisen pek a herhnak kong a rak au pi ve. Tattoo ngei mi caah cun thisen hi caan hman tein pek khawh a si ve lo. Voikhat an pek hnu ahcun thla tampi I dinh a herh tawn. Cu caah Ronaldo cu tattoo I suai ve duh loin midang caah thluachuah hmuh hi a thim deuh caah, upat a phu hrimhrim.

John Cena nikum news reporter pawl nih a tonnak ah wrestler dang bantuk in tattoo na tuah ve lonak a ruang  an halmi cu hi tihin a leh hna, “ka nu nih ka ngakchia lio tein taksa ah chingchiahnak Tattoo ti bantuk tuah hi a duh lo I, kan chungkhar nih kan duh lo. Tu ahhin ka duh cun kaa tuah kho. A sinain ka tuah ahcun ka nu a thin a hung tuk lai. Tatto tuah loin midang caah thisen pek dingin a duh deuh I, tutiang hi tattoo ngei ve hi ka duh lo” a ti. 

 388 total views,  1 views today

This function has been disabled for Chin 11 News.