Leitak Nih HmawngTlang Hi Kan Dawt Tuk Hna: By Thang Bawi Ling

#HT hi kan dawttuk hna ca ah kum 75 leng tiang kan ram ah kan umter hna. Leitak ram hmunkhatte in kan hmang tti hna.

#Leitak nih cun HT khua i thilttha vialte khi Leitak kan ta a si ve tiah kan iruah. Sihmanhsehlaw HT nih cun HT khua i a ummi thilttha vialte khi Leitak ta le ca ah a si lo., HT ta le HT ca lawng a si ti lungput an ngei. Cu lungput cu Leitak nih kan cohlan khawhlo mi a si.

#Phaipha in an rat lio ah Leitak khuate siding in inndong 30 in khua an ser. Kum 1946 (Leitak ramukbawi Mang Hnin a thih cangka) in loram kong hnahnawhnak tampi an kan tuah. Leitak theihlo in ramri hna an rak tuah (DC J. Ning Ling chan ah).

Cu Leitak theihlo in an tuahmi zong cu an duh tthan lo i Leitak ram hnarcheu kha 1959 ah inndong 90 le sattil 300 leng kan si cang ca ah kan cheu cang u, tiah cozah ah an hal tthan. Cu lio ah Mangkibawi Thawng Cin Thang pumpak a ra i thil sining vialte a zohfel dih. Leitak khuami cu HT nih ram kan cheu cang hna seh an ti i nan cheu kho hna lai maw? tiah Mangkibawi TCT nih a rak hal hna. Leitak ram cu kan cheu kho lai lo, kan sin tu ah rak ifonh deuh hna seh. Khuate dirhmun a rak simi kha hmunkhate tu in kan um tti lai tiah Leitak nih an rak sawm hna. Cucu HT nih an duhlo ca ah Mangkibawi TCT nih cuhlan anmah HT nih J. Ning Ling an tuahter mi ramri cu a hrawh i hlan nan umningte (ဗိုလ်ေနြမဲကျားေနြမဲ) in um u, tiah October 1965 ah order a chuah. Mah hi a hnubik cozah biachah mi a si.

Leitak nih hmunkhat ifonh ding in khuathar kan tlakmi cu kan ram nan kan chuh tiah 2016 in cozah zung a niambik Ohsuh in President zung tiang report an kan tuah tthan. Leitak ram hi thlum-al te in hmantti ding in 1) Ohsuh zung nih 6 Mar 2017 ah an kan remhchunh. HT nih an cohlang lo. 2) Myonay zung nih 21 Mar 2017 ah an kan remhchunh tthan. Remhchunhnak hmun ah kan hna a tla ti a si nain minthut ding ah zung an phak hnu in HT nih min an thu duh tthan lo. Cuticun a sangdeuh mi cozah zung ah an kai chin i President zung tiang an phan.

#Leitak nih hitin cozah zung kan phak lengmag mi hi a phi (result) ttha a chuak lai lo ti kan hmuh ca ah khuathum mipi tonnak 26-29 Dec 2018 ah kan ngeih hnu ah Leitak ram hmunkhatte in hmangtti ko usih. Kan report ca vialte la tthan dih ko usih. A luancia kan lungfahnak le ihmuhthiamlonak vialte tuzan thawk in kaltak usih law hlan bantuk in Leitak ram hi hmangtti ko hna usih, tiah 31 Dec 2018 ah a hnubik kan va len tthan hna. Cu zong cu an cohlang tthiam lo.

#Cutincun Chin State cozah nih voi 2 an kan remhchunh tthan. Commission zong an ser i voi 3 an kan remhchunh rih. Cozah nih an kan duhpi mi cu hmunkhatte ah umtti u, myo zong kan in sawkpiak hna lai an kan ti. Leitak nihcun kan sawm peng hna bantuk in Chin State cozah remhchunhnak cu kan cohlan nain HT nih an cohlang lo. Myo nan kan pek ahcun HT lawngin kan pe ko u an ti. Leitak he fonh an duh hrimhrim lo. Leitak ramchung ah umttung i Leitak mi nih sawm lengmang nabu in Leitak he umtti a duhlo mi cu khuaruahhar ngaingai khi a si cang.

 191 total views,  1 views today

This function has been disabled for Chin 11 News.