Leitak Le HMT Buainak A Ruang Bik Phuan Cang Ko Ning

1. Leitak ram ukbawi Pu Mang Hnin nawlpeknak in Hmawngtlang khua cu 1942 ah an rak tlak. Hmunhma a tha hlei ah khuami an i zuamnak thawng in HMT khua cu a thangcho ngai, nain Leitak cu an i thencheu i HMT nakin a hme deuhmi khuate ah an i chuah.

2. HMT cu siizung, police station, meithat zung le tanghra sianginn tiang an ngei cang caah Zophei tlang ah cun ‘myo’ ngah kho ding dirhmun ah a hun phan. Myo ngah khawhnak ding zong an i zuam.

3. Leitak zong nih 2010 hrawng thawk in ‘khuate vialte kan i fonh a hau, khua nganpi Modern Leitak kan ser lai, myo ngah khawh kan i zuam lai’ timi saduhthahnak an hun ngei ve. Biadang in chim ahcun HMT zuamcawhtu/challenger bantuk ah an hun cang(an zuam cawh ti duhnak a si lo).

4. Modern Leitak project an thawk hnu in ‘Hmawngtlang cu ram an ngei lo, Leitak ram ah khua a sami an si, Leitak ram nih a cawmmi an si, hnuk dinhmi an si, kan duhmi kan tuah khawh, an duh lo si le an ratnak Phaipha(Senthang) ah kir ko hna seh’ timi lungput le ruahnak cu Leitak mino lakah a hun karh.

5. 2015 ah Hmawngtlang nih an tih bikmi mangchia a hung phan, HMT khua ataw bak ah Leitak nih khua an rak tlak hnawh hna. HMT in Modern Leitak hi meng khat hmanh ai hlat ti lo. Leitak nih cun Hmawngtlang khuataw tiang lawng hmanh si loin an khua chung tiang khi ‘Leitak ram a si, kan duhmi kan tuah khawh’ timi lungput an ngei cang.

Chinram ah khua tlak cio a si ko nain midang khua a taw bak ah khua tlak hnawh ngaingai cu a um rih men lai lo. Biafang dang hman ahcun lakhruak khua luhhnawh ‘invasion’ he ai lo ngaimi a si.

Kan khua a taw cio bak ah khuadang nih khua rak tla hna sehlaw ‘ram nan ngei lo, kanmah ram a si, nan duh lo si le nan ratnak nan pupa khua ah kir ko u’ kan ti cio ve hna sehlaw zeitin kan ruah ve hnga?

6. Modern Leitak inn tampi cu Hmawngtlang nih kan ram an timi an khuataw bak ah an sak tikah an lungfak i cozah bawmh an hal hna. Cozah nih an zohfel i atuhi cuka hmunhma ah innthar sak ti lo ding nawl an chuah piak hna.

Nai kha Leitak nih innthar pakhat sak than an timh caah khua hnih kar tlawmpal an buai.

7. HMT khua a hrialmi lampi cu Leitak nih anmah thazaang in 2017? ah cawh an rak timh, nain HMT nih an rak kham hna caah an rak ngol. Nain, nai kha Lautu cheukhat le Mara cheukhat an sawm hna i cozah phaisa in cawh an tim than. HMT an lung a fak ve caah tlawmpal an buai than rih kha a si.

8. Leitak mino tampi nih Facebook comment ah an lungput an langhter theu, ‘HMT cu Senthang in a rak pemmi an si caah Zophei myo pek awk a si lo’ tiah zapi hmuh in an chim lengmang. Hihi zoh tikah ‘HMT myo ngah khawh lonak ding ah hnahnawh pek’ hi Modern Leitak project tampi lak ah pakhat a si hnga maw timi ruahnak a um.

Note: Mah khua hnih kong hi ka si khawh tawk in kum tam nawn ka kherhhlai vemi a si. An lungput theih khawhnak ding caah khua hnih in mino,upa tampi bia ka ruah hna.

Credit: Salai Lungthli Tum

 219 total views,  1 views today

This function has been disabled for Chin 11 News.