Lei Minh Nak Faktuk Ruang Ah Mithi Ruak 29 An Char Cang Hna, A Tlau Mi An Tak Tuk Rih

India ram Kerala state ah faktuk in ruah a sur mi ruang ah lei minh nak faktuk a chuak i lakphak dum a tuah mi hna pawl minung tamtuk an tlau hna tiah thawngzamh nih an langhter. Cun tuzanlei tiang ah khan cun mithi ruak 29 kan chuah khawh cang hna tiah Kerala state police thawngzamh nih cun thawngthanh nak an tuah ning a si.

Hi vawlei minh nak hi nizan tihni (Fryday) khan a thok cang mi a si ko nain ruah faktuk in a sur peng ruang ah le lei minh nak a zualhma ngai caah police lei le bawmchan tu dang hna zong zeihmanh an cawlcangh khawh lo caah nihin lawng in mithi ruak an kawl khawh hna hi a si.

Hi vawlei minh nak hmunhma hrawng ah hin lakphak dum a tuah mi chungkhar 78 tluk an um nak hmun a si caah a tlau mi an tam ngai ko, cun zanlei tiang ah khan cun ruak 29 lawng kan hmuh khawh rih caah a thi mi ruak kan hmuh khawh rih lo mi hna an tamtuk rih ko lai tiah kan ruah ko tiin an langhter chap mi a si.

Kerala state hi kum fatin ti awk in ruah sur le lei minh nak ruang ah mithi an tamtuk lengmang nak hmun zong a si. CUn nizan ah khan Covid-19 ruang ah hmundang i a taang mi hna a rak phur tu vanlawng accident nak ruang ah mithi 18 an um cang fawn.

Cun kan hnu thla chung ah khan India, Bangladesh le Nepal ram ah tilian le lei minh nak ruang ah a thi mi 300 lengkai an rak um hoi cang.

Source: Akon Thi (Burmese-Hakha)

 151 total views,  1 views today

This function has been disabled for Chin 11 News.