Lau Tuk Hlah Uh! By Victor Khen Sang

Kan chim / kan țial lengmang bantuk in Covid-19 zawtnak hi April ah hin US ahcun amuihcem nak caan aphan lai. Nihin Johns Hopkins University nih cazin an laak nak ahcun mithi hi 4000 an lonh cang ati. Nizan nak in alet in an karh ti awk khi asi cang nain mah hi rak chim cia, thanh cia mi thawngpang asi ko. April thla lai hrawng hi cu nikhat ah mithi hi thong tampi an si kho ti zong an chim cia asi. Asinain April thla ahung dih incun duhsah tein ahung zor lai i cu chung ah sii arannak an sermi pawl in siseh, mipi ihlat deuh in um uh, nan kut thiang tein i țawl lengmang uh, ti in ralrin an kan tuahter mi pawl in siseh, ațha lei kan panh lai tiah zumh asi. Achiatcem nak kan phan rih lo. Atulio Covid-19 in vulei cung mizaw hi 887,000 leng kai asi cang i US ah hin 190,000 leng an si cang caah vulei cung Covid-19 in azawmi vialte ah minung 5 chung ah pakhat tluk cu American minung an si cang ti asi. Johns Hopkins University of Medicine data hi HIKA hin rak zoh lengmang uh. Ka țial lio ah hincun atu cazin ning hi asi rih nain zanlei hmanh ah athong in akai kho țhan mi asi. Cucaah mizaw cazin le mithi cazin atulio thawngpang kan țial mi ahcun ai thleng rang bik an si ti kha theih chih ahau.

Cun lau tuk awk asi lo, thanh ciami kha acang cuahmah mi thil asi ko. Coronavirus zawtnak rai hi China in ai thok nain ziah atulio ah hi tluk in an nih an i buai pi ti lo ti an ceihmi ahcun; China nih Wuhan khua in zawtnak hrik ahmuh bak khan Wuhan peng kha aphih dih colh i heh tiah an buai pi colh caah China ram pumpi ah karh lo ding in an kham khawhnak kha asi an ti. Wuhan khua kha rak phit colh hlah seh law, China ah hin atlawmbik mizaw 700,000 an um cang lai an ti. Asinain atu ahcun khuakip ah company an hun, rian an thok țhan cang hna. US cu an ramuk tu pawl nih an chim bang, achuah ka ah cu tluk cu asi lai lo tiah kan rak i ralrin piak lo caah hi tluk in akan den nak hi asi tiah Mayor Cuomo zong nih achim. S Korea le US ah hin Covid-19 virus an hmuh ani hi ai khat ko nain S Korea cu minung tong tamtuk a test colh hna i ralrinnak atuah colh caah S Korea ah minung 100 an thih lio ah US ahcun minung 1000 leng an thi tiah CNN debate ah an chim len. Asia ahcun facemask – mai huh an i tuah dih lio ah nitlak lei ram ahcun social distance timi minung kha i hlat deuh in um ko uh, nan kut kha i țawl lengmang ko uh ti kha biapi in an tuah. Cucaah facemask-hmaihuh i tuah hi ahim deuh ko rua ti zongin an ruah.

Sii Kawlnak

Britain ram Oxford in Exscientia timi buu le Bill Gate nih adirpimi California ah aummi Scripps Research Institute i bawm in Covid-19 rai thlopnak sii ser ding in biatak tein thok an timh. Anmah pahnih hi minthang an si i zeidek an lawh te lai. Canada zong ah ZIKA virus le MERS virus khamnak caah rai khan sii (Vaccine) hlawhtling in arak chuah khotu Laval University of Quebec nih athar in Covid-19 vaccine an hneksak cuahmah ko. Atutiang ahcun Asia, Europe, America khoika hmanh in zapi ca asi cang timi Vaccine sii an chuah kho rih lo nain achuak chom ko lai tiah an ruah. Cozah nih ramkip ah mah Covid-19 tlangrai khamnak ding ah Vaccine sii kawlnak caah an phaisa an bungh dih cio ko caah thinphan tuk ding asi lo.

Tutan Covid-19 pulh rai nih akan cawnpiak mi cu thil fate abiapit zia kha asi. Hmai huh(Facemask), kut țawlnak (Sanitizer) hei ti hna hi dollar fangkhat dawr ah zuar cem an si i vuleicung pulh rai pi nih avun tlun hnawh tik ahcun fangkhat man thil kha fanghra in cawk awk zong aum ti lo. Mi zapi nih ralrin tawk iralrin kha kan rian asi i cu pinlei cu akan hruaitu kan cozah hna nih heh tiah an tawlrel ve lai nain adonghnak cu Sertu Pathian nawlngeihnak (Proverb 16: 1-2) kha asi cang.

Lau tuk hlah uh, caan hi Pathian sermi asi.

Ka lawm.

Victor Khen Sang

 144 total views,  1 views today

This function has been disabled for Chin 11 News.