Min Aung Hliang nih uknak a fir hnu in hmunkip kaakip ah raldoh cawnnak lawng a si cang. Chin ram chung CNF/A camp hmanh ah minung 15000 leng tlamtling tein raldoh an cawn piak khawh cang hna.
Tutan ah CNF headquarter ah CNN Journalist Sam Kiley Pumpak in a kal i, CNF ralbawi hna le treaining saya pawl zong ton biaruahnak a ngaih hna hi a si.
Dr. Sui Khar nih a chimmi cu “Atu tiangah minung 15000 leng raldoh kan cawnpiak cang hna i, atu hi athar a rak phanmi zong an tampi rih. NUG nih ralhriam damhpiak a zuam hna lai” tiah CNN ah a chim.
Cun a chimchapmi cu a rallaimi thla chungah Myanmar ram huap in kahdohnak a chuak ko lai tiah Dr. Sui Khar nih a chim chapmi cu a si. A sinain a fiang lomi nihcun hmaithla an ti. Hmaithla ti si loin a rallaimi thla a ti tikah zei thla ti cu a fiang kho taktak lo.
Atu hi khuapi chungah a pikpak in kahdohnak a um lengmang. A sinain a rallaimi thla chungah ram pumpi huap in ramchung ral cu a tho te ko lai tiah a chimchap fawn.
Hi vialte a chimmi cu CNN nih vawlei pi theih in a thanh caah, Min Aung Hliang le a ralkap zong nih an rak theih ve tik cu, an lung a nuam hrimhrim lai lo. Zei catiah CNF sin lawng hmanh in Minung 15000 leng raldoh an cawn ahcun hmun dangdang le tlangcung miphun dang sinah tam taktak an cawn rih lai caah, Kawl Ralhrang caah cun thinphan dai lo bak a si ko cang lai.
Leave a Reply