Lam Dang Zeihmanh A Um Ti Lo; Chin Miphun Dihlak Ral Kan Tu Cang Lai.

Chinram Pennak (5) Chinram Pennak caah Chin miphun Ral kan thawh cang! Kan pastor le khrihfa upa hna nih ‘A Donghnak Ralpi’ ah teinak kan hmuh khawh nakhnga Pathian sinah raithawinak tuah caan a si.

Ramchung ramleng ummi Chin miphun khrihfabu dihlak nih Bawipa sinah thlacam caan a si. Lam dang zei hmanh a um ti lo. Plan B a um lo. Chin miphun dihlak Ral kan tu lai. Maw Bawipa, Nangmah cu kan Teinak na si.

Chinram Pennak (4) Maw Bawipa, Chin miphun cu peng le tlang aa thenthekmi, holh phun a tammi, a sifahmi, thazaang a ngei lo mi, san a tlai lo mi tiah kan Ral hna nih zei an rak kan rel lo. An kan thah, an kan hrem, thil tha lo vialte kan cungah an tuah. Duh paoh in uk khawhmi, thanchonak tuahpiak a haumi miphun tiah an kan nihsawh men.

Bawipa nangmah cu kan himnak na si. Duhdim nun a kan pe kho tu taktak cu nangmah lawnglawng na si. Nangmah cu kan luatnak na si. Chinram cu Chin miphun nih kan sersiam lai. Chinram cu Chin miphun nih kan runven lai. Chinram cu Chin miphun nih kan pen lai. Chinram cu Chin miphun nih kan thangchoter lai. Bawipa na min cu a zungzal in hlorh si ko seh.

Chinram Pennak (3) Israel miphun cu an ram le an miphun runvennak caah chungkhar kip i kumtling pa pawl kha ithawh cio a si. Hruaitu nih minung zat kha an tukpiak hna i mahle phun le chung hruaitu cio nih minung thim i raltuk ah ithawh a si.

Chinram ah Mindat hi zohchunhawk tlak peng a si. Chinram le Chin miphun runvennak caah khuakip i mino, upa le tar tiang in an ithawh. Cucu peng kip nih kan ttuan dingmi miphun rian a si.

Tutan Chin miphun ralthawhnak hi Chin miphun tuanbia ah a um bal lo mi Chinram Pennak caah miphun ningpi in ralthawhnak a si. Meithal kan ngei ruangah a si lo, kan thawng ruangah a si lo. Chinram le Chin miphun kan dawt ruangah, runven kan duh ruangah a si. Chinram cu Chin miphun nih kan pen lai. Bawipa nih Chinram le Chin miphun runven ko seh.

Chinram Pennak (2) Pathian nih #Abraham kha a kawh i Israel #Miphun a ser — Abraham, Isaac le Jacob hna hmang in Israel miphun cu a hung um. Pathian nih Israel miphun kha #Joseph hmang in thluachuah a pek. Sihmanhsehlaw, a thih hnu ah Israel miphun cu Egypt sal ah an tang, kum zali reng lo.

Pathian nih #Moses cu a kawh i Israel miphun kha a kamhmi ram ah a hruaiter. Nawlbia parha a pek, an zulh awk dingmi #Phung a serpiak hna. Israel miphun nih hruaitu tha Moses thawng in luatnak an hmuh. Asinain, an rak vuivai peng, Egypt ram kha an hlam tawn, sal nun kha. #Joshua chan lawngah Pathian kamhmi #Ram cu an lut kho.

Kamhmi ram ah Israel miphun cu #Biaceihtu pawl nih an rak hruai hna. Sal an tang chel, an luat chel a si. A donghnak ah, Israel miphun nih siangpahrang an hal. Pathian nih Israel miphun cu siangpahrang a pek hna. Saul, #David le Solomon hna hmang in ram lianngan a ser. Sihmanhsehlaw, Israel ram cu chak le thlang ah aa then i a donghnak ah sal ah an tang than, Assyrian, Babylonian, Persian, Roman tbk. tangah. Pathian nih #Nehemiah kha a umpi i Israel miphun nih Jerusalem vampang an sersiam kho.

Israel miphun nih teinak an hmu zungzal lo. An saduhthah le an ruahchanmi cu Israel ram pennak a si. Phun dang in kan chim ahcun, Pathian Pennak kha a si.

Chin miphun zong British kan rak doh, Japan kan rak doh. Atu ah, Kawl ralkap a doh cuahmah lio mi miphun kan si. Kan tinhmi le kan saduhthah cu mah tein khuakhan lairel khawhnak nawl ngeihnak a si — Chinram Pennak. Chin miphun kan tahnak le kan hramnak cu Bawipa nih a theih. Chinram Pennak a tlung cang!

Chinram Pennak (1) Chinram Pennak a tlung cang! Bawipa nih caan a khiah cang mi cu aho hmanh nih an kham kho ti lai lo. Chinram le Chin Miphun cu Bawipa nih thluachuah pe ko seh. Catialtu: Ram Kulh Cung

Be the first to comment

Leave a Reply

Your email address will not be published.


*