Lal Luai Khua Ciammam! Ralhrang Tangah Rian A Tuanmi Fiang Tein An Langhter Dih!

Pu Lal Luai Khua ciammam fiang tein an van langhter dih cang hih. Nan/Kan khuami hna an i tel cio maw? Ralhrang kut tangah hlawh lak a timpeng hi khuami tal nih tuanvo lak cio ding a si cang. Tutan hi tluk in sualnak a ngeilomi mi a that cuahmahmi Min Aung Hlaing tangah rian tuan i timh hi cu kan biak kan Pathian lung zong kan tling sual lai lo. Khuami cio in i chimh i cawnpiak a herh tuk cang. A tanglei ah an min list tha tein kan van tar chih hih! Ral Zoh cio uh! Credit: TRC

Relchih Ding: CRPH Nih A Rannak In Tlangcung Hriamtlai (Armed Groups) Khawh Zokzok A Herh! Federal Army Maw, Union Army An Dirh Colh A Herh! CRPH le Dr. Sasa an i hnawh taktak a herh cang. Daihnak he duhsah tein kal-awk a ttha lo: Kawlram buainak kongah daihnak lam (peaceful mean) in kan kalpi lai; CDM in kan doh-kalpi lai; tibantukin CRPH lei in Dr. Sasa nih tam ngai a chim ka theih. CRPH nihhin mipi tamtuk an thi lai; thisen tamtuk a luang lai, ti an phan caah asi. Asi ne ah teh: daihhnak lam i tleih pah cun teinak hmuh khawh asi ngai hnga maw?

 

MAH nih ram uknak a laak hnu in: minung lungthin keng lomi ralkap pawl nih mipi an thah thluahmah hna hnu khan cun: daihnak he biaruahnak lam innka vialte cu ai khar dih cang. Mipi lei siseh, CRPH lei siseh: ralkap he bia ai ruah kho ding dirhmun an si ti lo. Vawleicung tuanbia zoh tik zongah meithal he ram uktu (silole) uknak latu a tam bik cu: hriamnaam he tho kho lo lakin an tthuat le an den cikcek ve hna lawngah uknak an thlah duh. Kawl ralkaap thlaaknak ding ahcun mah hi lam lawng hi a taang cang. Silole ralkaap tangah um tthan asi te ko lai.

 

Tulio kawlram mipi an thilinhsat lio ahhin CRPH hi ai hnawh taktak a herh cang. A rannak in tlangcung hriamtlai (armed groups) pawl khawmhsuat zokzok in Federal Army maw (silole) Union Army maw an dirh colh a herh. Tlangcung mino le Kawlrawn mino pawl a rannak in ralkap caah an sawn colh hna a herh. Ramdang cozah pawl sin zongah biatak tein hriamnaam bawmhnak kong an chimrel a herh cang. Kawlram buainak hi bia in daihter khawh ci asi lai lo.

Zei ram pawl sin ahdah chimhruahnak (lobby) an tuah a herh chih: Tulio US ramkhel thlihraan le nihin Kawlram mipi kan vanchiatnak pakhat cu: America cozah le mipi hrimhrim nih hriamnaam he ramdang va bawmh an duh lo ngaingai cang. US foreign policy an kapi ning zong hlaan he cun ai dang deuh ngai cang. Cucaah US hi Kawlram caah hmaisuang in bochan awk a ttha lem ti lo.

 

Cucaah Dr. Sasa le CRPH pawl nih biatak deuh in bia an ruah hna a herhmi cu: UK cozah (mah hi cu an ruah ngai ko rua hna); cun French cozah le Rohingya ruangah Kawl ralkap cungah a lungfaak vemi Muslim ram cheukhat: Turkey (NATO member zong asi), tibantuk pawl tiang khi bia chimhruah hna ah a herh. Politics cu a caan hoih i celh (play) ve thiam ngai a herh.

Zeiruang ahdah Kawlram kongah French hi abiapi ngai ah ka vun chiah: French hi UN Security permanent members 5 lakah pakhat ai telmi asi. NATO chungtel zong asi. Atulio an President Emmanuel Macron hi paduh lo taktak asi. Amah hi Donald Trump US president asi lio ah: democracy (free world) leader bantukin a dirmi pa asi.

 

Trump nih Europe leaders pawl bully a tuah hna lio ahkhan: Trump zong a hmaisen viar in a rak ti ngam tawntu le a dir-onh ngamh tawntu cu French President Emmanuel lawng kha asi. Hi pa hi ttha tein chimruahnak (lobby) thiam ahcun Kawlram kongah santlai taktak ding asi, tiah ka hmuh. Kawlram kongah tulio US kan cozah hi ka zoh lengmang tikah: meithal in zawn-hnawh hau ding hmanh si sehlaw: hmai suang in kal hmasa ai tim ding asi lo, tiah ka ruah. CRPH le Dr. Sasa an i hnawh taktak a herh cang. Daihnak he duhsah tein kal-awk a ttha ti lo. Credit: Van Dawt Ceu