Lairam A Ttap, Ngaihchia Taktak A Si Cang Mi Kan Dirhmun Kong

Ka nu Lairam lunghno in a ttap ruang mang.

Lairam le Laimi sin ah dawtnak a ngai a tla ti lo. Khuapi chung lawng hlah, khuate ko ah a zual hma. I dohdalhnak le i entainak lawng tein a khat. Laimi cu a harsa mi kan si. Eidin tirawl ah kan harsa i, hruk aih hnipuang zong ah kan harsa. Cun nakin a harsa deuh cang mi cu,” Dinfelnak”, hi a si cang. Bia tak nakin bia nuam kan duh deuh cang i, bia dik nak zong in bia dawh kan fuh deuh cang. Bia dik a chim mi paoh huat an tong i, biadawh chim a thiam mi an lar chin thluahmah.

Kan mifim pawl thlasang( ningtti) in an um, mirum milianngan an i dup . Mi tthawng zong bia kam kam khat hmanh ah pau ngam ti lo. An mawh bak lo, meithal peng par ah mizei fa dah ther lo cun a diar kho ruam hnga. Hmuh ning ai khat lo paoh ral ah kan ruat colh hna. Lih le hrokhrol a karh tuk. Kan mawh loh, “ Media “ si loin, “ Lihdia”, cu pei an tamtuk fom cu. Hi naknin ttih a nung deuh ding cu, fiar le tlei a tam chin te lai. Fiar le tlei i a hram cu, lihchim zeirel lo hi a si.

Kalauk tthim kua luhnak le mirum pa Vanram kainak tahchunnak chim thiam kan pastor ttha ttha le Evan ttha ttha khoi hen nan si dih? Hi vialte lih le hrokhrol hi doh ding ah nan ruat lo maw? A cheukhat pastor le Evangelist ko an bia ngeih ngam an si ti lo. Bia kam kamkhat an pau ah thisen luannak phun lawng te. Pulpit cung kai in “DAWTNAK LE NGAITHIAM NUN” kong an chim ngam tthan te hnga maw?, ti hi ka ruat ngai. A tang tthu mi nih, “ eee! A chim ve khi”, an in ti te sual hna lai ding ka phang.

Ram ttha um Lai pasal/ nusal ttha hna, nan tangka ah zei hmanthlak dah cuan ter rih ding nan i timh? “ Miluruh maw nan cuan ter lai, facang vui dah?”, mah le ruah ning cio a si ko hnga. Kan khuapi an king i, khuate thlasang in an um hi nan ruah rem cio lai in cun ka zum lo. Minung nunnak a sunlawi tuk hringhren hi kan philh sual tawn hlah maw ti ka ruat tawn. Kan mah nih kan tuah ding a si ahcun a ttha ko hnga nain mi tawsawh le forh hman i cu kan i tthinh ah a ttha in ka ruat.

Laimi le Lairam sin in a tlau cuahmah mi, “ dawtnak , zawn i ruahnak le dinfelnak” hi hmunhma pek tthan ding in kan nu Lairam nih a kan hngah tthiptthep ko. A phu hnga lo ding ah nunnak le sining dihlak thap ding hi,” ka nu Lairam”, nih a kan duh piak mi a si hrim hrim lai ti hi kei cu ka zum bak lo. Kan pahrang ngeih mi cio tu in Lairam le Lai miphun caah nun ding tu hi a kan duh piak mi a si deuh ttheo lai in ka zumh.

Credit….LAI COMM

Be the first to comment

Leave a Reply

Your email address will not be published.


*