Laimi Zumtu Kan Caah Sullam A Ngei Khunmi Puai Cu Christmas Hi Asi

Christmas hi Laimi zumtu kan caah sullam a ngei khunmi puai sunglawi a si. Miphun huap in puai pical tampi kan ngei lo. Biaknak lei puai pawl: Kum Thar, Thawhtthan, le Christmas, hi hna pathum hi biapi bik in Laimi nih kan ngeihmi an si.

Tho asiloah thlaithar hi an tuah pah cio tawn, asinain siaginn le zung khar a si theng lo i, Christmas tluk in a hung hlai kho lo. Chin National Day timi miphun ni pi zong hi puai sunglawi in kan tuah ko nain, biaknak lei nih kan hlunhlai pi kho lo i, a sunlawi hnga ning tluk in nihin tiang kan hmang kho lo.

Christmas tu hi cu vawlei cung puai pi a si bantukin, Laimi kan ca zong ah sullam a ngei khun. Kan fale nih thilthar, kum khat chung ah voi khat te an i hruk khawh caan, cingla rualchan kan i ton i hniang kan i hrawm caan, khua lei tlun caan, a phunphun le a bu bu in Xmas cu tuah a si i November zarh dongh in Christmas ni tiang, thla khat chung, puai tuahmi a lawh khawh caah a sunglawi bakmi puai a si.

Tukum 2020 cu pulrai pi nih a kan tuah kanh i, zeihmanh cawlcangh awk a ttha lo. Kanmah ngandamnak le himnak kong a si caah cozah sin ah puai tuahnak nawl hal phun zong khi a si fawn lo.

Cucaah Christmas kan sunlawih ning, kan tuah ning tu kha, kanmah lei nih thlen a hau. Zapi rawl dum ttinak, picnic phun in a bu bu in tuahnak, i pumhnak, lengkhawmhnak, tbt, kan tuah kho ti lai lo.

Asinain, Christmas sullam muru a simi, peknak le midang nun va hrawmhnak kha cu tuah khawh cio a si ko. Sizung um mizaw, thongtla, le ralzam hna he an sining i hrawm khawh a si.

Zapi rawl kan i dangh dingmi phaisa, asiloah a bu bu in kan tuah dingmi Xmas caah kan timhtuahmi phaisa kha mizaw, thongtla, le ralzam kan unau hna sin ah phakter khawh a si ko.
Hla pakhat ahcun “Xmas cu dawtnak pek caan a si: Xmas is a time of giving love” a timi kha zawnruah nunsamhnak in hmang ve hna usih. Pulrai zong nih a zawtnak a chawnh khawh lomi, a thah khawh lomi cu dawtnak a si. Christmas cu tuah bak ko usih.

Thlennak:23
Lal Pek Lian