Laimi Vialte Caah Thawngpang Tha Bak Asi! A Ropui Tuk!

TCP-Thantlang| 10 May 2020| Hakha khua ah a voi khatnak bik COVID-19 zawtnak hmuh mi nu telh in minung 14 hna cu May 8 hrawng ah swab lak in Yangon ah chek dingin an kuat mi hna cu an dih lak in an zawtnak thiang(Negative) an si dih tiah May 10 ah zan ah tuanvo ngeitu sin in kan theih.

“Hakha kan nau nu a zawtnak Negative a si timi cu a dik ko. Amah he telh in minung 14 cu an result a tha dih ko tiah an kan kuat. Tuanvo ngei tu hna nih phung ning in thawngthanh nak tibantuk cun an tuah lo. Kan mah email tuah an kan kuat lengmang. Thaizing si lo kip ah chek kan i tim than, voi hninh hrawng Negative a si ah cun a tlam tling cang ko lai dah tiah ka ruah.”tiah Hakha siizung COVID-19 kongkau chimphuannak nawlngei tu Dr. Mang Biak Kung nih TCP ah a chim.

Hakha mizaw case (no. 150) nu he neihniam in um mi hna Hakha peng le Thantlang peng in minung 90 tluk zong Quarantine chiah dih an si hna, cu chungah swab zong minung 60 renglo lak in an chek cang hna i an dihlak in Negative an si dih tiah theih a si.

Hi zawtnak kong he pehtlai in Chin ram chungah zawtnak ngei minung 6 an um i cu chungah Tedim ah thlop mi case (no.1) cu dam tein siizung a chuak cang. Kawl ram chungah May 10 zansuimilam 8 tiang cazin ningah zawtnak ngei minung 180 an si i a thi mi 6 le a dam than mi minung 72 an si cang tiah ngandamnak le zaangleknak zung nih thawngthanhnak a tuah.

 366 total views,  1 views today

This function has been disabled for Chin 11 News.