Laimi Ramthumnak Kan Phak Hnu i Kan i Chapmi Pakhat!

Laimi ramthumnak ummi nih “Bia el tthawng” kan i chap rih
———————————————————

Laimi ramthumnak kan phak hnu in kan i chapmi pakhat ah ka ruahmi cu “Bia el tthawng” hi a si. Laimi ramthumnak kan phak hnu in “bia el kan tthawng” tuk hna. El car i bia el kan hmang. Mah nak kum upa deuh zong bia el. Mah nak cawnnak sang nei deuhmi zong bia el. Mah nak a thei le a fim deuh zong bia el. Hruaitu zong bia el. Bia el tthawng hi thil ti khawh le fim le thil tampi a theihmi phun ah kan ruah. Bia el tthawng in boih (degree) pek siseh law Laimi ramthumnak a phanmi boih (degree) a lami/a hmumi kan tamtuk cang lai. Bia el tthawng tuk cu huat a tlai tukmi zia a si. Laimi cu bia el hi nuamhnak phun in a ruatmi a hmangmi zong kan um. Umhar phen i tuah ding phun ah kan ruah cang.

US ram zongah kum saupi kan um cang ko nan US ram tuanbia kong kan rel bal lo. Kan thei lo. Nan nichiar tlawmpal te kan hmuhmi le kan tonmi chung in heh tiah a thei tuk le a hngal dih bantuk in biachim kan hmang. Mirang hmai ah mahti khin va chim law mihrut ah an in ruah lai/a thluak hman lomi ah an in ruah ko lai. US ram tuanbia kong hna ah kan theih lo bu piin mi bia va el len ding kan si lo. A theimi, a relmi le a cawngmi chimmi tuk kha ttha tein ngai ko u sih.

Laimi bia el ning phun hi cu hruh bia el, ruahdomhnak sawh i bia el, pakpalawng bia el, santlaihnak le tthathnemnak um lo bia el, caan dih men le caan paam hmai men bia el, i siknak le i huatnak men a chuahpitu bia el, i tthen cheunak men a chuahpitu bia el, theih hngalhnak i chap ding a um lomi bia el, kan thlarau thazaang a hrawktu men a simi bia el, le a dik a hmanmi a hrawktu men bia elnak phun lawngte an si.

Bia el kan huam ning phun hi mi nih a fim, thil a thei ngai ve ka ti hna seh ti duhnak men phun a si. Cauk zong ukkhat zong rel bal ve lo. Thawngpaang (news) zong ngai fawn lo. Mifimthiam deuh ttialmi ca zong rel fawn lo. Lai pawl i thawngpang ttukttak tete an ttialmi hei relmi chung in le nitin rianttuannak i tlawmpal te hei hmuhmi le theihhmi chung lawng in heh tiah biachim i mi bia va el len kan hmang. Michim chinmi tlawmpal te hei theih chinmi chung in hehtiah mi bia el kan hmang. Theihmi le hngalhmi neih ttung loin heh tiah mi bia el tthawng tuk hna hi hruh phunkhat a si ve. Khrihfa kan cawnpiaknak he zong a tlak bak lomi ziaza a si. Bia el a tthawngtukmi cu hawi zong nih an rem hna lo. An umnak poh ah buainak a chuak peng lai.

Kan Bible chung zongah Bia el san a tlaih lo ning le a tthathnem lo ning le hruhnak men lawng a sinak kan hmuh. 2 Timote 2:23 “Bia i al lengmangnak, hruhnak men le zeihmanh hngalh set ttung loin i al lengmangnak hi hrial i zuam, zeicahtiah hi bantuk bia i al lengmangnak cu i siknak ah a dong ti kha na hngalh.” Paul zong nih Timote kha bia elnak hrial ding a fial. Laimi ramthumnak a ummi bia al hrial cang ve hna u sih. Bia elnak in i thahnak tiang a chuak kho. Bible nih a kan cawnpiakmi cu fimnak le theih hngalhnak neih duh ahcun mi biachim kha lungsau te le ttha tein ngaih ding lawng a kan cawnpiak.

Na theih na hngalh ttung lomi kong ah hehtiah bia elnak i na va tel ahcun hruhnak le santlai lomi chungah ka lut ti kha va philh hlah. Fim kan duh le a thei hngal vemi si kan duh ahcun kan nak in a theihmi biachim kha ttha tein ngai u sih. Kan nak in cawnnak a neimi biachim kha ttha tein ngai ko u sih. Kan nak upa le hruaitu te biachimmi kha ttha tein ngai ko u sih. Mah ti cun khrihfa ttha zong kan si lai i a fimmi le a hlawhtlingmi zong kan si fawn lai.

Bia el a tthawngtukmi cu Khrihfa ttha zong an si kho bal lai lo. Ref: Van Tum

 223 total views,  1 views today

This function has been disabled for Chin 11 News.