Laimi Nih Pathian Kan Zum Lo!

Note: Hi caa hi mah ruahnak (opinionated article) asi! Soisel duhmi nih soisel uh! Amen duhmi nih amen thluahmah!

Laimi hi biakam hlun Israel mi kan lo tuk lawmmam! Biakam hlun israel zong Pathian nih kha tlukin an hmai bakah khuaruahhar a rak tuah piak tuk ko nain, Pathian kha an mer tak lengmang! Moses ni 40 le zan 40 um lo kar te hmanh ah siasal biaknak leiah an rak i mer manh hoi! Pathian kha an rak zum lo hringhran dah! Rili sen zong a lai bakah a then piak hna hnuah cun zumhnak in a khat ding an si cang lioah, tlawmpal ah an zai colh than!

Virus a um hnu hin ka ngiat ka ngiat le, Laimi nihhin Pathian kan zumhmi hi a rak i dang cio hlah maw ti hna ka ruat! Virus hin kanmah in i ven kan i tim cio hna! Pathian nih a kan ven lai ti hi kan zum bak lo a tam deuh hi cu! Ziah Pathian nih a kan ven khawh hi nan zumh lo! Keimah nih ka hna bakin ka theihmi asi! Pathian nih a kan veng lai lo a timi an um! Zumhnak a tlawm hringhran dah!

Matthai 19:26 “Hihi minung caah cun a si kho lo, sihmanhsehlaw Pathian caah cun zeizong vialte hi a si kho ko” hihi kan Bawipa Jesuh bak nih a chimhmi asi! Asi ah teh ziah hi zawtnak hi kan tih i kan ai! Pathian kan zum lo maw? A thil ti khawhnak kan zum lo maw! Zumhnak thi maw kan si ne? Jeim 2: 14-26 i tuahnak tello zumhnak cu zumhnak thi asi ne a ti bantuk kha kan si ko rua! Zeitluk in na minung sinak in i ralring law Pathian sinah thlacam law zumhnak na ngeih lo ahcun santlai lo asi ko! Bawipa nih khua cu a ven lo ahcun a vengtu hna hngilh loin an umnak cu santlai lo asi!(Salm 127:1b) Zeitluk in ralring law i veng law, Pathian sinah thlacam law na zumh tung lo ahcun santlai lo asi!

Tlangkomhnak: Zumtu Pathian nung zeipaoh thil a ti khomi a biami nihcun hi zawtnak hi kan tih awk asi lo! Zeiltuk nai ven i na ralrin zongah Pathian na zumh tung lo i Pathian nih an ven lo ahcun na minung lei i na ralrinnak cu pakpalawng asi! Cu caah Pathian nih a ka ven lai tiah ka zumh! 100 ah 100 ka zumh! Tu ni tiang sanitizer le mask voikhat te hmanh ka hmang rih lo! Pathian sin ah himnak ka hal i tutiang zawtnak nih a ka tlunh rih lo! Minung thil siammi nakin ka biakmi ka Pathian ka zumh deuh! Thihnak in thawhter khotu Pathian nihhin hi zawtnak hin a ka khamh tuk lai ti hi 100 ah 100 ka zumh!

 302 total views,  1 views today

This function has been disabled for Chin 11 News.