Laimi Nih Biakinn Pumh Caan i Kan i Palh Taktakmi!

Laimi (Chinmi) nih Biakinn pumh caan hi Kawlram academy laksawng pek puai bantuk phun ah kan ruah cang tiah ka ruah, kan hnipuan hruk ningzoh tik ah
———————————————–
Laimi (Chinmi) biakinn kan I pumh tik I kan hnipuan hruk ning konghi ttial ka duhnak a sau ngai cang,US ram ka phak hnu in. Aruang cu US ramah kum 7 le cheu leng ka um cang I mirang buu deuh lawngte ah ka pumh hnu in mahkong ttial duhnak lungthin ka nei. Mirang Khrihfa buu le Laimi (Chinmi) Khrihfa buu, biakinn I kan I pumh tik i kan hnipuan/kan thilhruk dan a dang tuk. Phungchimtu pastor tiang in an I dang. US ah kum 8 deng ka um hnuah mirang buu kipah ka pum. Mirang buu zongah member sinak voi 5 hrawng ka la cang. Annih cu phungchimtu lawng nih coat le nekttai an I hruk. Mirang bu cheukhat le bang ahcun phungchimtu senior pastor hmanh nih coat le nekttai hruk loin phung a chimmi an tamtuk. Mah pawl cu an feltuk, an I biatak tuk fawn. Cun member pawl zong biakinn an rat tikah a sawh2 tein an ihruk ko. A chiatuk, a tlek dihmi le a hnawm tukmi an I hruk ka ti duhnak a si lo. Ka chim duhmi cu thil manfak, sui le ngun tipawl tor in an I hruk lo. Thil manfawi, zoh dawhmi, a thianghlimmi, a sawh2te kha an I hruk ko hna. Mah nih a sawh duhmi cu biakinn cu Pathian thangtthatnak hmun a si I Pathian thangtthat ding le biak dingah thinlung tak he ka ra ti a langhter. Mahtin hnipuan an I hruk nan Laimi Khrihfa nak in a zeilei poah an fel deuh fawn.

Kawlram ka rak um lioah an chim tawn ka theihmi cu ramdang um Laimi (Chinmi) pawl cu biakinn an I pumh tikah hnipuan tthat le motor tthat an I zuam ti hi si. A poinak bik cu biakinn pumh kan rat tikah kan hnipuan a ttha bik le man fakbik le sui le ngun kan neihmi vialte, le kan Lai coat le sung tin par hni ti bantuk pawl langhter le cawngia ah kan ra hna. Pathian thangtthat tik ahcun thinlung a biapi ti cu kan theih fawn ko nan, kan hnipuan hruk le kan thinlung put cu phundang pi a si cang. Mah ruangah kan phungchimtu nih an chimmi zong zei huaha kan I cinken kho ti lo, kan I lawipi kho ti lo. Kan I pumhmi le phungchim kan ngaimi pawl vialte kan ziaza le kan thlarau caah santlai lo bantuk an si cang. Aruang cu kan hnipuan, kan motor manfak, le kan thil mansung pawl ah kan lungthin a um dih cang. Nangmah pakhat nih thilpuan manfak tuk le sui le ngun na hruk ahcun an hmutu vialte thinlung na vaivuanh ter dih cang hna. Cu nih a chuahpi mi cu nangmah bantuk in biakinn pumh rat tikah thilmansung le hnipuan ttha he rat kha an duh ve cang. Pakhat le pakhat hnipuan tthat kan I zuam cang. Hnipuan manfak kan I hrukmi nih phungchim zong tha tein a kan ngai ter kho ti lo. Laimi nih kan hnipuanthar le manfak le thil mansung pawl hi biakinn lawng2 ah kan I hruk ttheu. Mah hi a ttha bak lomi a si. Biakinn cu Pathian thangtthatnak hmun a si tikah kan thinlung a dawntu thil pawl vialte kaltak in Pathian biak ah kan rat awk a si. Kan hnipuan ttha le manfak pawl cu Lai miphun Ni, Lai kumthar, Nupi tthit puai le puai dang2 hna ah kan I hruk awk a si ko. Laimi (Chinmi) biakinn I kan hnipuan hruk ning nihhin tampi Khrihfa kan sinak ah tthangchonak tampi a kan donh tiah ka ruah. Mah hi hlawt cang hna u sih. Mirang nawl khi I cawn cang hna u sih. Laimi kan poinak le kan palhnak cu biakinn pumh tik I hnipuan sawh2te a hrukmi cu Khrihfa ttha ah kan ruat kho hna lo, a piangthar lomi ah kan ruah hna. Mah hi a palh tukmi ruahnak a si. Na thinlung dawhnak kha Pathian duhmi le cohlangmi cu a si ko. Mirang bu ka pumh I thilpuan ttha nawn ka hruk ahcun keimah le keimah ka ning a zak. Mirang cu hnipuan sawh2 te he biakinn ah an ra ko. Pathian biak ahcun thinlung a biapi deuh timi an I fiang tuk. Biakinn cu I zumhnak hmun le thil manfak cawngianak hmun a si lo ti an I fiang tuk ruangah a si ko. Pulpit cung I caan a neimi pawl zong hnipuan sawh2te an I hruk ko hna.

Hnipuan le thil mansung le thinlung konghe a pehtlaimi Bible caang ka thim/ka khomh hna I mah cu pakhat hnu pakhat fianternak ka rak tuah lai. A cheu Bible caang cu fiangter loin ka kaltak lai. Ttha tein rak rel ve uh. Laimi nih biakinn ah Pathian thangtthat ding in kan rat tik ah hnipuan zoh dawhdeuh le a thianghlimmi kan I hruk ahcun a za ko. Man fakfak a herh lo. Na thinlung le an hmutu thinlung lam a vaivuanhter hna, Pathian thawngttha ngai thiam loin. Thil mansung le hnipuan manfak na hruk ahcun na thinlung cu mah na thilri cung lawngah a um ko lai. Pathian biakah na ratmi cu santlai lo a si ko lai. Laimi cu hnipuan tthattha le manfak kan I hruk ko nan a fel lo ngai le Khrihfa ttha lo ngai kan tamtuk fawn.

(1 Samuel 16:7) “Sihmanhsehlaw Bawipa nih Samuel sinah cun, “A muisam in siseh, a pumrua in siseh, zoh hlah, zeicahtiah amah cu ka hlawt cang; zeitintiah Bawipa nih cun mi i an zohning in a zoh lo; mi nih cun lenglei langhning kha an zoh, sihmanhsehlaw Bawipa nih cun lungthin kha a zoh, tiah a ti.” Pathian nih na hnipuan ttha le na lenglei dawhnak a zoh lo, na thinlung put kha a zohmi le a duhmi a si ko.
(James 2:2-4) “Tahchunhnak ah, mirumpa pakhat cu sui kutdong hrolh le hnipuan ṭhaṭha in nan i pumhnak ah a ra, cun misifak pakhat cu hnipuan ṭet fiapfuap he a ra ve. Hnipuan ṭha he a ramipa cu upatnak nan pek i, ‘Hika ṭhutnak ṭha bik ah hin ṭhu tuah,’ nan ti i misifakpa tu cu, ‘A dir in dir ko, asilole ṭuang ah hin kan ke hramah hin ṭhu,’ nan ti ahcun, nanmah lakah thleidannak nan tuah a si i ahmaan lomi lungthin in biakhiahnak nan tuah a si.” Nihin Laimi biakinn pumh tikah mah bantuk thleidannak hi a tamtuk cang. Biakinn chung hmanh I thleidannak na neih ahcun Khrihfa ttha cu na si kho bel lai lo.

(1Peter 3:2-6) “Zeicahtiah zeitluk nun thiang in dah nan nun ti le zeitluk in dah nan upat hna kha anmah nih an hmuh ko lai. Lenglei ṭamhnak, nan sam phiarning tehna, nan ṭhi nan hlawn tehna, nan thil nan thuam tehna ah khan nan i dawhnak cu a um awk a si lo, nan i dawhnak cu nan chung muru ah a um awk a si i cu nan i dawhnak cu a tar kho lomi nemnak le daihnak lungthin, Pathian mithmuh i a sung bikmi thil a simi kha a si. Pathian a rak i bochanmi nu hna cu, cu bantukin an i dawhnak a simi an si — an vale nawl an ngaihnak ah khan an i dawhnak cu a si. Sarah kha cu bantuk cu a si; Abraham kha a nawl a ngaih i, “Ka bawipa,” tiah a auh.” Mah hi fianter zong a hau lem lo, a fiang ngai ko.

(1Tim 2:9-10) “Nu zong aa za tawk le aa dawh tawk in i thuam hna seh ti ka duh. An sam kha a hlei a hluat in i tom hna hlah seh, sui hlawn le lungvar hlawn le hnipuan man sang tuktuk in i ṭamh tuk hna hlah seh. Biaknak a ṭanhmi nu nih an tuah tawn bantukin ziaza ṭha tu in i thuam hna seh.” Mah zong a fiang tuk fawn ko, fianter a hau lo.
(Gen 1:27) “Cuticun Pathian nih minung cu amah mui lo in a ser, minung cu Pathian mui in a ser hna. Mipa le minu kha a ser hna.” Pathian muisam keng na sinak cu na hnipuan manfak le thil mansung ah khan a si lo. Na thinlung na ziaza na khuaruah ningtu ahkhan a si deuh.

(Mathai 23:5-8) “Zei paohpaoh kha mi hmuh rem lawngin an tuah. An cal i an i khih chihmi Cathiang bia khumhnak bawmte khi zeitluk in dah an ngan i an puanki khi zeitluk in dah an fual, zoh hna hmanh u! Rawl danghnak hmun ah upatnak hmun i ṭhut kha an duh i pumhnak inn ah ṭhutnak hampiak kha an ngen. Zatlang lam ah mi nih upatnak in upatnak kan pe hna seh ti kha an duh i, ‘Saya, saya,’ ti kha an tlaihchan. Sihmanhsehlaw nannih cu ‘saya’ ti kha va duh hlah u, zeicahtiah Saya cu pakhat lawng nan ngei i nan dihlak in u le nau nan si.” Hnipuan ttha le thil mansung na hruk ahcun mihmai I chawh le I langh zong na duh deuh ko lai I midang I upat zong na deuh ko lai. Hnipuan ttha he rumra ngei I pumhnak I um na duh ahcun Farasi le phungbia cawnpiaktu bantuk na si ve tinak si ko.

(1Korin 6:19-20) “Nan pum cu Thiang Thlarau biakinn a si kha nan hngal lo maw? Cu Thlarau cu nan chungah a um i Pathian nih an pekmi hna a si kha nan hngal lo maw? Nannih cu nanmah ta nan si lo, Pathian ta nan si; a man in cawkmi nan si. Cucaah nan pum cu Pathian sunparnak caah hmang u.” Na hnipuan ttha le manfak kha Pathian ta an si lo, na pum tuk kha Pathian ta cu a si. Na hnipuan kha Pathian sunparnak caah na hmang lai a ti lo, na pum kha a timi a si ko.

(Rom 12:2) “Hi vawlei kalning hin kal ve lengmang ti hlah u, sihmanhsehlaw chunglei in Pathian nih nan lungthin kha a dihumnak in in thleng hna seh. Cu tikah a ṭhami thil le Pathian nih a lawmhmi thil le a tlingmi thil kha nan hngalh khawh lai, cucu Pathian duhmi an si.” Hnipuan ttha le thil manfak he puai I kal cu vawlei kalning a si. Biakinn ahcun mah ticun kan I hruk awk asi lo.

(Mathai 5:28) “Sihmanhsehlaw kei nih cun, ahohmanh nih nu kha sual duhnak lungthin he a zoh ahcun, cu pa cu a lung chungin a sual cang, tiah kan ti hna.” Mah hi Bawi Zisuh chimmi a si. Nupawl hnipuan ttha le man fak ngai hnipuan he biakinn I nan rak ahcun pa pawl thinlung nan vaivuanhter cang hna. Pa pawl thinlung le mit nan pialter ahcun nangmah he pa he nan sual cang tinak si.

(Phung 31:30) “Iang hi hlen a hmang, dawh hi a ziam kho, sihmanhsehlaw Bawipa a ṭihmi nu cu thangṭhat awk a si.” Nu pawl zong nan hnipuan manfak, nan sui le ngun, nan lenglei dawhnak cu Pathian duhmi a si lo. Cunak in amah na ttihmi, na upatmi cungah a lawm deuh.

(Luka 20:45-27) “Mizapi nih cun an dihlak in an ngaih ko lioah khan Jesuh nih a zultu kha a thawh hna i, Phungbia cawnpiaktu saya pawl kha i ralring hna u; annih cu angkifual pipi i hruk in chawh a duhmi, chawdawrnak hmun ah mi nih hmaizahnak in ka chawnbia hna seh ti a duhmi, pumhnak i ṭhutnak ṭha aa cuhmi, puai i hmun ṭha aa hammi an si; mi nih ka hmu hna seh ti duh ah thla sau pipi in an cam, sihmanhsehlaw nuhmei kha an thilri le an inn tiangin an chuh ṭung hna. Dantatnak an hmuh ding cu a fak chinchinmi a si ko lai, tiah a ti.” Farasi pawl le Phungbia cawnpiaktu saya pawl zong angkifual pipi I hruk I mihmai langh le rumra nei ngai I um le upat pek an duh tuk ve. Nang zong thil mansung le thil manfak na hruk ahcun mah bantuk thinlung kha na nei ve ko lai. Pumhnak chung zongah tthutnak ttha deuh ka pe hna seh ti na duh deuh ko lai.

(Phung 11:22) “Aa dawh ngai nain ruah thiamnak a ngei lomi nu cu vok hnar sui tumbul tonh bantuk a si.” Mah zong a fiang ngai ko, fianter a hau lo tiah ka ruah.

(Isaiah 3:16-24) “Bawipa nih, ‘Jerusalem khua nu hna khi zohhmanh hna u, zeitluk in dah an i zumh! An kal ah van lawng an cau i ahohmanh an hmu hna lo; a khiah in an i khiak. An fengbeo i an i thlaihmi an khi-ing tete cu ring cherhmarh hna seh tiah kar tawi tete in an kar. Sihmanhsehlaw dan ka tat cang hna lai -an lu ka meh hna lai i lu kawng in ka chiah hna lai,’ a ti. Bawipa nih Jerusalem nu hna cu, an i porhlawtmi thil paohpaoh a lakkanh dih hna lai ni a phan lio. An fengbeo ah an i khihmi le an lu ah an i khimhmi le an hngawng ah an i oihmi le an kut ah an i khihmi hlawn vialte cu a lakpiak dih hna lai. An lu an i khuhnak puan le an luchin le an ban le an tai ah an i khihmi camh le an kutdong hrolh le an hnarthlaih le an puan ṭhaṭha vialte le an angki fual le an puai puan hna le kutput zal hna le an thlamlang hni hna le la hmangṭhia pavuah hna le an lu an i khuhnak puan hme tete hna le lukhuh thlamlang vialte hna cu a lakpiak dih hna lai. Zihmui kha hmang ti loin a thut in an thu lai, taisawm ṭhaṭha kha hmang ti loin hrihrual hrat pipi tu kha an hman hna lai, samthlairem dawh si ti loin lukolh an si cang lai; puan ṭhaṭha kha i aih ti loin puan tlek chia pipi kha an i aih lai; an i dawhnak cu ningzahnak ah aa thleng lai!” Bible chan lio Isarel miphun hna zong an I zumtuk nan an thinlung put le an thiltuahmi le an ziaza cu Pathian nih a fih tuk. Mah ruangah Pathian cu anmah dantat ding a timlam. Lainu Laipa pawl zong nan I zumh tuk i biakinn chungah hnipuan tha le manfak he porhlaw ngai le I uah ngai in nan rat ahcun Pathian nih fak piin dan an tat ve hna lai. Mah ti pumhnak na rat ahcun Pathian he kan I hla I ka pumh man san a tlai lo ti kha philh hlah. Biakinn chung I I pumh hi Kawlram academy laksawng pek puai bantuk le US ram I Oscars laksawng pek puai bantuk in hmang ti hlah u sih tiah kan sawm hna. Kan thinlung dihlak he Pathian biak le thangtthatnak ah hmang cang hna u sih. Biakinn pumh rat tik i hnipuan tthattha le manfak i hruk ttung i Khrihfa ttha lo ngai si cu zeidah santlaihnak a nei? Ref: Van Tum

 103 total views,  1 views today

This function has been disabled for Chin 11 News.