Laimi Cu Mu A Fimmi Kan Tamtuk I A Hrutmi Kan Tlawmtuk Hi Kan Rawhnak Pakhat A Si.

Laimi cu mah sinak le sining i hmu lo le i thei lo in midang soi le thangchiat hi kan huamphun ah kan i la,kan mah cio hi mifel le a dik ah kan iruat a palh kho lo bantuk ah kan i ruat,palh timi hi a cohlan thiam mi ca ah cun fimnak hramthoknak bak a si.

Midang palhnak le sinak soi na timh hlan ah khan mah te hi van ruat ta hmanh, na palhmi an rak um bal ve maw? a um bak lo ahcun soi hna thangchiat hna a sinain nangmah tu i zoh hmasa tawn law midang dawt na hlawh hlei ah a fim mi na si lai.

Nangmah nih minthatnak na duh ruang men ah na tuan hawi, na hawikom an sining thangchiat le an sinak thatlonak chim hmang zuar hmangmi na si ahcun nangmah kha an mahnak in mi tha lo deuh le a hrut deuh mi na rak si ti i thei. Nangmah biapibik ah nachiah mi kha hlawnhlaw midang kha pakhatnak ah chia hna cu ticun nangmah le midang an sunlawinak le biapi an sinak kha na theih khawh lai.

Na lungtluan lo ruangah le na duh bang an um lo ruangah soisel thangchiat hna hlah,cucu mifim um ning a si bal lo,Laimi cu mu a fimmi kan tamtuk i a hrutmi kan tlawmtuk mi hi kan rawhnak pakhat a si. Riantuan timi hi nangmah duh mi le duhning na tuanmi long kha riantuan a si lo,riantuantimi cu mah le tuah hnga ding cio kha tuahtuan hi a si ko, na tuahtuan ding a silo mi mi palhnak kawl le soisel cu that lo a si hlei ah thathut a si.

Nangmah fimtuk ah na hmuh lio ah khan na pawng i lamkam kut dok mi silo ah tangcheu hmanh awngkho lo mipa nih khan cu pa hruh cu an ti khawh ve ti kha philh hlah..mi hruh puh le sualpuh hi kan rian a si lo kan rian a si mi tu cu zapi kha kanmah he i lo in zoh thiam kha si ko. Nalung an tawn lo ruang ah thangchiat le huat in na lak ahcun a mahnak in na hrut deuh na tha lo deuh ti kha i thei,

Catialtu: Salai Dk

 172 total views,  1 views today

This function has been disabled for Chin 11 News.