Lai Pasaltha Hna Cu Hi Ti Hin An Si Ko!

Chin ramkulh cozah bu luban pawl cu nihin zingpit te ah Kawl ralkap nih an inn cio ah an vung tliah hna i Rungtlang ah an kalpi hna.

A dang tlaih a tongmi pawl cu an thlah cang hna nain Chief Minister Pu Lian Luai, Speaker Pu Zo Bawi, Chin ramkulh cozah chimnak nawlngei U Soe Htet le Hluttaw vice-chairman Pu Tei Thang hi atu tiang an thlah rih hna lo tiah Chin ramkulh NLD ttuanvo ngeitu upa pakhat nih The Chin Journal ah a chim.

“Nizan deilei sml. 2:00 hrawng ah hruaitu zapi tlaih an si. Tu zanlei sml. 3:00 ah CM Pu Lian Luai, Speaker Pu Zo Bawi, U Soe Htet le Pu Tei Thang an tlaih hna. Annih hi atu tiang an thlah rih hna lo. Rungtlang ah an chiah hna,” tiah a chim.

Chin ramkulh cozah bu chungtel le hluttaw chungtel a si lomi NLD hruaitu pawl zong ralring in um kan hau, tiah a chim chap.

“Atu tiang cu lung dai in kan um ko. Asinain, ralrin cu kan hau pah,” tiah a langhter.

Nihin zanlei ah Kawl ralkap nih Chin ramkulh cozah bu chungtel pawl meeting an auh hna. Zei kong an ceih timi bel fiang in kan thei kho rih lo.