Lai Pasal Tha Pu Ral Kham Le Dr. Thla Cung! Uar An Um Bak Hih!

Pu Ral Kham le Dr. Thla Cung nih Ralkap Rian Khinhmi an Cohlang Lo! Hakha khuapi tthanchonak rian a ttuantu ding Committee chungtel ah Chinram SAC Chairman Pu Ngun San Aung nih Hakha khua upa 6 rian a khinh hna i minung pahnih nih atu tiang ah an cohlang lo, tiah kan theih.

Dr. Thla Cung nih, “Kei cu mah rian hi ka cohlang lo ka ti ko kha. Ka Facebook zong ah zapi theih in ka ttial ko,” tiah The Chin Journal ah a chim. Pu Ral Kham cu The Chin Journal nih kan pehtlai kho lo nain a tunu pakhat nih “Rian an khinhmi a cohlang lo” tiah nihin a chim.

Hakha khua upa Dr. Thla Cung, Pu Ral Kham, Pu Cung Hu, Pu Thawng Kian, Pu Chum Ling le Pu Thla Bik cu Pu Ngun San Aung nih rian a khinh hna nain micheukhat nih, “Kanmah chimh ta loin rian a kan khinh. Ca a kan pek hnu lawng ah riankhinh kan simi kan i thei,” tiah an chim. Credit: The Chin Journal

Theih Chih Ding: Zeitinhme an Lei ahcun ka ttan khawh lai? Judah saltang hna an temtuar a fak tuk. An ram ngaih a fak. Hnabei dong le lileng in Babilonram tiva kam hna ah an va thu i an va tap tawn. Cuti mitthli he aa ciahko mi hna cu, an ngaihchiatnak ruahpiak duhlo in Babilon mi hna nih nan ram le nan Pathian hla kan sak piak u an ti hna.

A hrutmi nih cun kan Pathian hlasak an kan onh tiah ilawmh ding in a um. Nain Judahmi hna nih an theih ko. Zion hlasak an fialmi hna hi zalonnak pek an timh hna ruang ah a silo, Pathian thangthat an duh ve ruang zongah a silo. Zomhtaihnak le thlanglamhnak a si. Cunih cun an thinlung feichunh in a chunh chin hna. Cu an tahnak cu Salm 137 ah a lang. Zeitindah miphun dang hna sin ah kan Pathian thangthatnak hla cu kan sak khawh lai … maw Jerusalem, nangmah kan philh ahcun ka orhlei kut hi car sehlaw ka lei hi ka dang ah bet koseh … an ti.

LaImi kan ttahnak hi Babilon saltan kum can a si cang. Chuh kan tong, ramh kan tong, hlen kan tong, hrocer kan tong, hrem kan tong, thawldawi kan tong. Dawtnak in serh le timhtuah piak a um ballo. Pek kan ton can hmanh ah dawtnak silo in hlen le rawinak ca ah an si deuh. Sianginn siseh, sizung siseh ar rawl fah in an kan fah. I cuh ding fang in. Uico bang thideng in an kan sehter. Biatha a lomi karlak ah sersat le zomhtaih aw a cuang peng. Cu thil hmuh le theih ko bu ah … zeitinhme an lei ahcun ka ttan khawh lai???

Federal mi an tarh. Vopi pek mi an kamh. Kum 70 chung an rak tuah duh ballo mi tlukruannak kong an chim. A fektuk mi cakhenh cung Panglong Biahren hmanh a merhtu hna hi ruahdamh in an bia a fek lai tiah zumh khawh a si hnga maw? Cuhna lei ahcun zeitinhme ka ttan khawh lai?

A dingmi thimnak kan tuah lai an ti. An rak ding bal maw? Phunghram kan remh lai an ti. Remh kho an si lio ah an rak remh duh maw? Eihmuar kan doh lai an ti. An rak do bal maw? Ram vengtu kan si an ti. A tu ah hodah ramchungmi a nawng cuahmah tu le miramh tu an si? Nika le thlapa hmanh kan kamh hna ai kun an tuah ciami ah pei an tuah laimi hmuh khawh a si ko cu … Zeitinhme hihna lei ah cun ka ttan khawh hnga? Credit: M Thawng Kam