Kum Khat le A Cheu Ah NUG Cozah An Dirhmun Le PDF Ralkap

Thla 19 Chung NUG Dirhmun Zohnak
========================
National Unity Government (NUG) cu April 16, 2021 ah dirh a si i Nov 16, 2022 ah khan thla 19 a tling cang. PDF zong hi May, 2021 ah dirh thok a si caah thla 18 renglo, thla 19 chung an lut ve cang. Hi thla 19 chung NUG dirhmun kha a tawinak in kan zoh lai.
People Defense Force (PDF)

Atu tiangah NUG he pehtlaihnak a tuahmi, NUG tangah a ummi PDF 221 an um cang i Karanni ramkulh i KNDF le Chin ramkulh i CDF hna relchih ahcun mipi vengtu hriamtlaibu 300 renglo an si. PDF 63 hi NUG Ministry of Defense theihpinak an hngak lio tiah theih a si.

PDF hi an dihlak in 65,000 hrawng an si i cu chungah zatuak 20 hi hriamnam tling an i tlaih kho i zatuak 40 hrawng hi kutser meithal lawng an i tlaih kho rih. October, 2022 cazin ningah PDF 300 renglo an um i PDF pakhat ah minung 200 in 500 tiang an um.

Local Defense Force (LDF)
—————————————-
LDF hi tualchung vengtu ralkap an si i April, 2022 tiangah khan 401 an um cang tiah NUG nih an thanh. LDF hi mahle hmunhma ah mah thazang tein a cawlcangmi an si. NUG le tlangcung hriamtlaibu (EAOs) hna tangah an um lo nain pehtlaihnak a tuahmi LDF 354 an si.
LDF 100 hrawng cu PDF ah an i thleng, an lut i cheukhat cu Public Defense Team-PDT (ပြည်သူ့ကာကွယ်ရေးအဖွဲ့–ပကဖ) ah an lut. LDF dihlak ah chungtel 30,000 hrawng an um i cu chungah zatuak 25 cu PDF ah an lut cang tiah theih a si.


Public Defense Team (PDT)
——————————————
PDT hi khuapi chungah kahdohnak tuah ding, a herh ningin PDF hna bawmtu ding, mipi lemsoinak tuahtu ding, hriamnam le thildang phawrh-thiarnak bawmtu le PDF ah a lut tharmi hna raldoh cawnpiaktu dingah NUG nih an sermi bu a si.

NUG nih an thanh ningah peng 330 ah PDT 250 an dirh khawh cang. Hmasa ah cun khuate hrambunh in ser a si i a hnuah khuapi deuh zongah serchap a si. A bik in PDT hi Sagaing le Magwe ramṭhen ah an tam. An i tlaihmi hriamnam cu mah serchom meithal deuh an si.
NUG nih PDF fawi deuh in tlangtlak nak dingah tiin Military Division Commands-MDC hmun 3 an ser. Kachin, Sagaing, Magwe, Mandalay le Chin ramkulh hna cu MDC-1 an si i hi chungah PDF 200 hrawng an um.
Cu pinah hriamnam serchuahnak hmun 70 an tuah khawh cang tiah theih a si. NUG Ministry of Defense nih War Office zong an sak lio a si. PDF hna nih an herh bikmi cu meithal le zenkuan a si. PDF zatuak 60 hrawng lawng nih meithal an i tlaih kho rih.

Caan tawite chungah NUG hi PDF tampi a funtom khawhmi le meithal zeimawzat an pek khawhmi hi an hlawhtlinnak pakhat a si. NUG cu mipi nih dirkamhmi cozah a si ko nain zei ram hmanh nih phungning tein an cohlang rih lo i hriamnam le tangka zongin an bawm fawn lo. Cu bu cun rian tampi an ṭuan khawh. NUG nih tangka an hmuhmi a tam deuh cu hriamnam cawknak/sernak ah an hman.

AA nih a ralkap 30,000 hrawng meithal tlaihter dih dingah kum 13 an rau. MNDAA zong 2009 in hrimhṭhan an i thok i kum 13 a rauh hnu lawngah atu dirhmun khi an phan kho. TNLA nih a ralkap 8,000 hna meithal tlaihter dih dingah kum 12 an rau ve. Cucaah kum hnih tling lo, thla 19 chungah NUG nih atu bantukin rian an ṭuan khawhmi le hriamnam an chuahpi khawhmi cu an ṭhawng tuk ti a lang.

Cun NUG hi tangka kawlnak lei ah an hlawhtling ngaingai. Spring Lottary (နွေဦးထီ), NUG Bond (ငွေတိုက်စာ ချုပ်များ), inn hmun zuarnak le NUG-Pay in tangka tampi an hmuh. Tukum October tiangah NUG nih tangka an kawl khawhmi dihlak US Dollar nuai 55 a tling. Hriamnam cawk/sernak lei lawng si loin anmah ukmi hmunhma ah uknak, biaceihnak, fimcawnnak, ngandamnak le a dangdang tampi an ṭuan khawh cang.

Thla 19 chungah hitluk in NUG nih rian an ṭuan khawh hi ramchung ramleng in mitampi an khuaruah a har cio. Putin nih Ukraine fawitein kan lak lai tiah a ti i atu tiang an lak khawh lo bantukin SAC nih NUG le PDF pawl cu caan tawite chungah kan hloh viar hna lai an timi cu bialo ah a cang.
Cucaah ramdang zong nih NUG hi naihniam deuh in an chawnhbiak lengmang cang hna. UN le ASEAN nih chawnhbiak an duh bal hna lo nain atu cu Myanmar ram buainak tuahremh dingah cun NUG he biaruah a hau tiah an chim cang. Cucaah thla 19 chung NUG dirhmun cu ṭhancho lei a panh ti khawh a si.
Salai CP Lian
Nov 24, 2022

Be the first to comment

Leave a Reply

Your email address will not be published.


*