KNU Hmun Ram Ah Kahdohnak Aa Peh Than Ee

KNU B-3 Hmunram Chung Ah I Tukdohnak A Um Than
*********************

KNU B-3 hmunram Kyauhkyi – Nattankun lampi cung ah tukdohnak a um tiah tualchung mi nih thanlwinkhit ah an chim theih a si.
Nihin January 8 zing Sml 5 hrawng in Nattankun lampi cung um Naungkung le Yanmyoaung khuakar ah KNLA le SAC kar ah tukdohnak a chuah cu a si.

Tukdohnak fak chuak in hriamthawng phuntling theih a si i hriamngan an kahmi cu Nattankun khuachung zong ah a tlami a um tiah tualchungmi nih an chim nak theih a si.
Tukdohnak ruang ah motor lampi hna cu phihkhar nak neihchung i thilo le hliamtuar kong bel theih a si rih lo.

Relchap>>>>>>Chin Hmelchunh Ah Sia, Vakok le Chokhlei Hmanṭi Khawh An Si
====================
A tialtu: B. Chan Khar
Biadomhnak
Ṭhingṭhang Mekazin (March 2017) i Editor-in-Chief Salai Siangawr Vanhnin cabia ka rel hnu in, hi cabia ṭial hi ka lung ah a um. Editor-in-Chief nih, ‘Chinmi Miphunpi Hmelchunh Cu Sia A Si,’ tiah tlang a tar. A cabia chimmi sia kong ka lung a si ngai. Asinain sia, vakok le chokhlei hi Chin miphun hmelchunh ah hmanṭi khawh an si, ti tu kaa sehchih lai.

 

Salai Siangawr Vanhnin Cabia Cuanhnak
••••••••••••••••••••••••••
Sia le vakok a cuaichun hna. 1850 hrawng lio ah Laimi nih sia hi nupi man, sualtuah thiluanh remnak le thihlo ah an hman cang, a ti. Kan ‘pupa’ nih sia tluk in caw le na an sunhsak hna lo, a ti. Cucaah, kan ‘pupa’ chan in, sia cu, saṭil mansung a si, a ti. Vakok zong nih sia cu, a tluk lo, a ti. Chinram ah British ralkap an kai hnu in, thlanglei Chinram kan unau pawl nih vakok hi an sunhsak. An zumhnak ah vakok (vapual) cu, lungfek a ngei, a ral a ṭha, an ti, a ti.
Zalonnak kan hmuhka (1948) hrawng in, sianghleirun siangngakchia nih biatakte in an dirpi caah, vakok cu, Chin hmelchunh in hmuh a si, a ti. Vakok/ vapual cu, Chin hmelchunh a si awk a si lo, sia tu a si awk a si, a ti.

Chin Hmelchunh Ah Sia, Vakok le Chokhlei Cu, Hmanṭi Khawh An Si
•••••••••••••••••••
Australia ram hmelchunh saram cu, kangaroo (saphawzalngei) a si. Australia ram hmelchunh vate cu, emu a si. An ram hmelchunh pangpar cu, suirong ‘wattle’ pangpar a si. Australia ram Victoria State i an hmelchunh saram cu, possum zu a si; an hmelchunh vate cu, partlan vate ‘honeyeater’ a si; an ramkulh pangpar cu, ‘heath’ timi a si. USA ram hmelchunh saram cu, American bison a si; an ram hmelchunh vate cu, mupi (bald eagle) a si; an ram pangpar cu, rose pangpar a si. Australia le USA bantuk hin, vawleicung ram tampi nih an ram hmelchunh saram, vate, pangpar le thingkung tiang in an ngei cio.

Chin miphun nih chokhlei cu, Chinland pangpar ah kan cohlan ti awk a ṭha. Duhlonak a langhtertu Chinmi an um lai lo dah. Vakok zong kan hmelchunh vate ah kan cohlan ti awk a ṭha. A min ‘vapual’ maw ‘vakok’ dah ti i vaa alnak dah lo, lungtlinlonak a um lai lo dah. Sia zong cu, Chin hmelchunh saram ah aa tlak bikmi a si. Ṭhingṭhang Mekazin Editor-in-Chief nih a langhter bang, sia cu, kan zatlang nun kong ah a kan fimtawltu a si. Kan pipu chan lio in, lainawn le thiluan sivelhnak kong ah sia nih cun dahkaw a rak remter ko hna cu. Phundang cun, sia nih Lai pipu kha ‘Criminal Law’ ngeih hau lote in a rak remter hna. Thisen chuahtu kha thongtlak hau lote in sia nih a rak kan ti awk a si.

Sia nih dahkaw, mi fapa le mi fanu dawhte kha pumkhat a rak siter hna cu ti awk a ṭha. Cucaah, sia tluk in Laimi a kan ṭhathnemtu saram an um lo. Sia le vakok cu, saram pei an si cang cu timi ruahnak a um sual hnga maw? Cu bantuk ruahnak a va um zong ah, vakok cu, vate a si; sia cu, keli ngei saṭil a si. An pahnih in, kan miphun hmelchunh ah hmanṭi khi kan sunghnak ding a um lo. Cucaah, sia, vakok le chokhlei cu, Chin hmelchunh ah hmunkhatte ah hmanṭi khawh an si. Mahte lairel uknak kan ngeih ahcun, Chin cozah nih official in Chin hmelchunh ah thim te ding in an i tlak. Chinland Constitution (Phunghram Ahran) voi 5nak Articles 236-238 nih Chinland hmelchunh ramsa cu, sia a si lai; Chinland hmelchunh va cu, vakok a si lai i, Chinland hmelchunh pangpar cu, chokhlei a si lai, a ti.

Chin Muikhenh le Flag Ah Sia, Vakok le Chokhlei Hmanṭi Khawh An Si
•••••••••••••••••••
Australia ram (coat of arms) muikhenh ah an ram hmelchunh saram, vate le pangpar an cuang. USA cakhenhpi (great seal) ah an ram va mupi a cuang. Spain ram flag ah chiandeih a cuang. South Georgia & South Sandwich Islands ram flag ah nengpi, penguin va, rili chiandeih le chiandeih an cuang. Cayman Islands ram flag ah chiandeih le chungchep (chungkuh) an cuang. Hong Kong ram flag ah an pangpar ‘Bauhinia blakeana’ a cuang. USA Mississippi State flag ah an pangpar ‘magnolia’ a cuang.

Cucaah, Chin muikhenh, flag le cakenhpi ah kan hmelchunh sia, vakok le chokhlei cuanter khawh lonak lam a um lo. Chinland Constitution ahran Articles 232, 234 le 235 nih Chinland cozah cakhenh (seal), Chinland Governor cakhenh le Chinland flag suisam te dingin a chiah. Muikhenh (coat of arms) kong tu cu, Chinland Constitution nih a chimmi a um lo, a herh lo ti ruang ah a si kho. Asinain a fiang komi cu, Chinland flag le cakhenh cu, suaisam (design) te ding khi an si. Chinland muikhenh (a herh ahcun), cakhenh le flag ah sia, vakok le chokhlei cuanter te awk kha aa tlak ngaimi an si. Muikhenh, cakhenh le flag ah an pathum in cuanter dih ding le ding lo cu, Chinmi nawl a si. Chokhlei kong belte ah khin, ruah awk a um ve. Chokhlei rongci (colour) ah senduk, sen-eu, arang, aihre ti bantuk in an um. 2015 ah Myanmar cozah nih Chinram chokhlei kong dothlatnak (research) a tuahmi a chuah. An dothlatnak cabia ah chokhlei sen-eu le chokhlei rang a langhter hna. Cucaah, Chinram ah chokhlei rongci phunkhat lawng a um lo. Chinland cakhenh, muikhenh le flag design tuah tik ah, chokhlei rongci zeizatdah hman a si lai ti kha i fian a hau te lai. Aa dawh bik ning le a ṭhat bik ning in design suai te ding a si.

Biadonghnak
•••••••••••••
Chin hmelchunh ah vakok lawng hman a herh lo. Sia le chokhlei he hmanṭi khawh an si. Australia te le US te zong nih an ram hmelchunh ah saram, va le pangpar an hmanṭi ko hna. Chin muikhenh, cakhenh le flag ah sia, vakok le chokhlei hmanṭi khawh an si. A cunglei i langhtermi ram le ramkulh nih saram, va, asiloah, pangpar an hman ve ko hna.
The Chin Post Weekly Journal
Vol-2, No 1
B. Chan Khar cu Thantlang peng Tlangpi khuami a si i Australia ah an chungkhar in an um! Swinburne University of Technology ah Bachelor of Laws & Bachelor of Criminal Justice & Criminology a cawn lio a si!

Be the first to comment

Leave a Reply

Your email address will not be published.


*