Kayin ramkulh,Phapun pengkomh, Mutaw pengkomh chung ah ralhrang phu hna le KNLA kar August thlachung ah kahdohnak voi 56 a chuak,atu zong ah brigade 2 hmunhma ah ralhrang phu hna nih minung thazaang an chap caah kahdohnak a chuak than lai tiah khua mi hna thin phang in an um.
August 3 ni in ni 15 ni tiang ah KNU brigade 5 hmunhma chung ah ralhrang phu hna le ramri hngak (BGF) phu hna nih ralhrang minung thazaang chap in le an hriam thazaang an chap,hmunhma lak in cawlcanghnak an tuah,sakhan an saknak ruang ah nitin in kahdohnak a chuak tiah KNU thawngzamhnak nih August 18 ah cathanh an chuah.
Kahdohnak chungah ralhrang phu lei in minung 34 an thi,tat-yin-hmu pakhat tel in minung 15 nih hliam an tuar, KNA brigade 5 lei in minung pathum nih hliam an tuar i,khaumi pakhat a nunnak a liam.Ralhrang phu lei nih an kah mi hriamngan lung 88, hriamhme 1500 tluk cu khuachung leikuang, dum chung ah an puak.
Mutaw pengkomh brigade 5 chungah fakngai in kahdohnak a chuak kho mi a si tiah KNLA brigade 5 in biachimnak nawlngeitu duh-buhmugyi Saw Kalay Doe nih a chim.
July thla chung ah kaphnih kar kahdohnak voi 134 a chuak.Cu chung ahcun ralhrang phu lei in minung 8 cu an nung bu in tlaih an si, 115 cu an thi i minung 101 nih hliam an tuar.Motor 2 cu hrawh a si i, rang pahnih thah a si,rang pali nih hliam an tuar tiah KNU nih cathanh an chuah.
KNU brigade 2 hmunhma chungah ralhrang phu hna nih minung thazaang an chap,kahdoh cawlcanghnak thadeuh in an tuah hlei ah kaphnih kahdohnak a chuah nak hmun khua pawng ah an um kal caah Kayin ramkulh,Tan Tantawnggyi peng,Sanaykung khua mi hna cu kahdohnak a chuak than lai an phan caah an zaam tiah khuami hna sin in theih a si.
Atu ah brigade 2 hmunhma chungah ralhrang phu lei nih thazaang chap in cawlcanghnak an tuah caah fakdeuh in kahdohnak a chuak kho tiah brigade 2 in tat-hmu pakhat nih ralrin ding in a chim.
Khuami hna caah lo facang hmun, meh hang dum le thingthei dum hna hmun in an chuah tak caah eiding kong leng ah furcaan a si caah um thut dir nak le ngandamnak caah thinphang a si ko tiah ralzaam bawmchan tu hna Kayin mino pakhat nih a chim.TCP
Leave a Reply