Nu le nu, pa le pa sualnak caang hi kan Bible ah hmun sarih ah hmuh khawh an si. Cheukhat nih cun hmunruk an ti, aruang cu Noah le a fapa Ham kong an telh lo.

1.Genesis 9:20-27

2.Genesis 19:1-11

3.Levitikas 18:22

4. Levitikas 20:13,

5. 1 Korin 6:9–10

6.1 Timote 1:10,

7. Rom 1:26-27 hi an si.

Zei ruangah dah Noah le Ham cu homosexuality (pa le pa sualnak) ah an telh hna ti ahcun Ham (Kanan pa) nih a pa Noah cu a tlaihhrem i a sualpi tiah an ruah caah a si. Zeiruangah a sualpi ti ahcun Ham nih hin an chungkhar a lubik, a bawi bik sinak a duh caah a pa cu a tlaihhrem i a sualpi ti si. Mah a sualpi nak nihkhan a pa cungah ningzahnak a tlunter a si/a sining a zorter kan ti lai cu.

Mahtik ah Noah cu a lung a hungfim tik ah a fapa Ham nih a cung i a tuahmi (tlaihhremnak) cu a hunhngalh tikah a thin a har tuk i Ham cu chiat a serh. “A tuahmi” a hun hngalh timi khi a taklawng a ummi a hmuh i a hlawm duh lo kha a si lo. A tlaihhrem i a sualpi mi tuk kha a rak si deuh ti si. Bible ahhin nu le pa sinak tuahmi phun hi a phun2 in an ttial.

Adam nih Eve a hngalh a ti tikah “hngalh” (know) i a sullam cu nupa sinak a tuahpi ti duhnak a si. Mirang Bible ah a umtu ning cu “to see the nakedness of someone” ti cu nupa sualnak atuahpi ti duh a si. Lai holh cun mi pakhat taklawng sinak hmuh cu a sualpi ti duhnak a si. Levitikas 18 chung zongah “to uncover the nakedness of somenone” timi cu taklawng a ummi hni va kau/hni va hlip ti duhnak asi i cucu nupa sualnak tuahpi kha a chim duhmi a si ko.

Ham nih a pa Noah cu zu a rit i thlamchung a rilh lioah a hni a hlip i a tlaihhrem e ti si. A pa kha niamter i ningzahter i amah kha cung i i cawi a duh ruangah asi/lubik si a duh ruangah. Kan Bible ah nu le nu, pa le pa umhnak kong a um lo. Nu le nu, pa le pa sualnak kong a chimmi pawl hi biaknak pakhat nih an hmanmi pa i zuarnak, nu i zuarnak le i tlaihhremnak kongdeuh an si hna. Rom 1:26-27 chungah a chimmi zong khi Rom khuapi i the Isis cult nih an hmanmi a si. 1 Korin 6:9–10 le 1 Timote 1:10 chung i a chimmi zong khi pa pawl an i zuarnak kong le pa hngakchia deuh pawl sualpi nak kong deuh an si. Genesis 9:20-27 le Genesis 19:1-11 chung i a chimmi zonghi i tlaihhremnak kongdeuh an si, pa le pa i tlaihhrem kan ti lai cu.

Catialtu: Saya Van Tum