Kawlram Thlennak: By Salai Van Bawi Lian (Martin)

Ralkap uknak a dih, 2011 kum ah cozah thar a kai in aa thleng mi: –

1. Chinmi ramchung ramleng kan i pehtlaihnak a fawi deuh ning le rian kan tuanti khawh ning

2. IT thanchonak he khuapi, khuate thlu lo, Phone kan hmang kho i pehtlainak a thawn ning

3. Lam le sul, ti le mei a thancho deuhnak nih chuankhin, tintuk khuasak le nun a nuamter deuh ning

4. Zalong deuh in “cozah kan soi,” ‘lam kan zawh,’ kan ipumkhawm i kan chimrel khawh deuh ning

5. Ramdang NGOs bu, bawmhnak le Company an luh ruang ah thanchonak, rian a karh deuh ning…

A cunglei thanchonak langhter mi hi Kawlram thlennak ruang ah kan hmaika ah kan hmuh mi an si. Tampi a um rih…

A si kun ah hi vialte thlennak a chuahter tu, a tlamtlintu aho dah a si?

U Than Shwe maw? U Thein Sein? Daw Aung San Suu Kyi maw? Ralkap dah? Asiloah USDP? NLD maw? Tlangcung hriamtlai phu pawl deuh dah?

Ahohmanh an si lo. Hi vialte thlennak a chuahpi tu cu “2008 KAWLRAM PHUNGHRAMPI” asi.

Ralkap uknak in Democracy uknak a chuahtertu “System (စနစ္) asiloah Uknak Phung a thlengtu 2008 phunghrampi” a si. Zei ruang ah “2008 Phunghrampi” a chuah.

Tlangcungmi hriamtlai, NLD, Siangnagkchia, Nuhrin covo bu, Vawleicung bu tampi le cozah nih ralkap uknak kan rak doh. A dikthlir in a dohtu taktak cu “MIZAPI” kan si.

“MIZAPI” nih lungrualte in kan dohti zungzal ruang ah “2008 PHUNGHRAMPI” in thlennak a chuak i atu kan hmuhmi thanchonak zong a chuahpi chih.

ASINAIN 2008 PHUNGHRAMPI cu a dikmi thlennak taktak a chuahpi kho tu a si lo caah aho paoh nih kan doh. Abik in tlangcungmi nih “TLANGCUNGMI DUHMI FEDERAL DEMOCRACY PHUNG” kan ser lai tiin ralkap le cozah he ramkhel biaruahnak an tuah i an ceih cuahmah lio a si.

Mizapi nih KAN I FIANG lai ka zumh.

A tling lo kan timi “2008 phunghrampi” hmanh nih thlennak zeimawzat le thatnak a chuahpi ahcun “TLANGCUNGMI nih kan duhmi “FEDERAL DEMOCRACY PHUNG” chinchin nihcun zeitluk in dah hmailei kan miphun, kan biaknak himnak, damnak, thanchonak, le zalonnak a chuahpi hnga. Ruahdamh khawh a si ko.

Cu caah CHIN MIPHUN nih … “Kawlram Thlennak DIK taktak a chuahpi tu cu pumpak minung ah si loin “SYSTEM (စနစ္) asiloah UKNAK PHUNG” a si kan i fian i kan tanti a herh.”

Cucaah Chinmi le tlangcungmi nih kan duhmi UKNAK PHUNG cu kanmah miphun lila lawng nih kan ser khawh. Lungdong loin kan izuam, kan tanti ahcun a si kho lomi a um lo.

TLANGCUNGMI nih kan duhmi FEDERAL DEMOCRACY “PHUNGLAM” thlennak caah…

CHIN MIPHUN le TLANGCUNGMI lila nih kan fimthiamnak, pumpeknak le lungrualnak thazang he lungdong lo in kan izuam a herh. Kan miphun chung in a fitmi, hngalhkauhnak a ngei i aa pumpe kho mi hruaitu, MP tlinter izuam hna usih!

Salai Van Bawi Lian (Martin)

8 June 2020 (Chinram)

 129 total views,  1 views today

This function has been disabled for Chin 11 News.