Kawlram Sianginn Kai Than Nak Kong A Fiang Cang, An Timh Tuah Ning Zong A Tha Ngai

July 21 ah Kawlram chung fimcawnnak sianginn on hram an thawk cang lai, tiah theih a si.

“COVID-19 ruang ah a caan ning in June thla ah sianginn kan ong kho ti lai lo. A herhmi runvennak pawl tuah dih ta hnu July 21 tu ah on ding in timhtuah a si. High School (Taang-9 le Taang-10) hi kan on hmasa lai,” tiah Myanmar ram fimcawnnak zungpi Executive Director U Ko Lay Win nih BBC ah a chim.

Siangngakchia pawl sianginn an kai tik ah pakhat le pakhat zeitindah aa hlat deuh in an tthutdir lai tibantuk le sianginn chung ah zeitindah cacawnnak an tuah lai tibantuk zulhphung pawl an tuah lio a si i, an tlamtlinh dih in zapi theih in thanh a si te lai.

Taang-9 le Taang-10 hi on hmasa an si lai i, July thla chung thotho a dang Middle le Primary pawl zong on cio an si lai. July thla ah sianginn on ding in timhtuah a si cang caah 2019-2020 cacawn kum i caminpuai an rak phitmi pawl zong (Taang-10 dahtilo) June thla chung ah Result an chuah cang lai.

Taang-10 result belte hi caan laak deuh in check le timhtuah a hauh caah August thlathawh lei hrawng ah kan chuah kho te hnga maw, tiah U Ko Lay Win nih a langhter. COVID-19 runvennak abiapit tuk caah June thla chung in sianginn an on zong ah siangngakchia an tam tuknak sianginn pawl cu zinglei le zaanlei tthen in a cheucheu in sianginn kaiter ding in timhtuah a si.

Cun, cacawnnak khaan pe 34×24 hrawng a kaumi ah cun siangngakchia 20 nak tam cacawnter an si rih lai lo. Cucaah, COVID-19 boruak in a vun kan detkhawt bang in Myanmar ramchung fimcawnnak tthutdir ningcang zong phundang in a hun i thleng ve lai. Siangngakchia vialte zong COVID-19 runvennak ca ah acozah lei nih Mask le Face Shield phawt dih ding in timhtuahnak an ngei, tiah theih a si.

 361 total views,  1 views today

This function has been disabled for Chin 11 News.