Min Aung Hlaing Ralhrang pawl nih CDF pawl nan hriamnam chia cang uh tiah ca an tar . Kan nawl nan ngaih lo i nan kan doh ve peng a si ahcun nan cimit lak in kan in doh cang hna lai tiah an tar.
Chinram lawngah a si lo, Kawlram khuapi hmun tampi ah mah ca hi an tar i PDF pawl nan hriamnam chia cang uh tiah an tar. Khuapi hmun cheukhar ahcun motor in an vak i a au in an au chiah.
Sipin zung tibantuk ah mah ca hi an tar khuan tiah Sagaing ramthen hrawngah an chim. An catar mi cu Sipin nih an hawh i an hloh caah SAC ralhrang nih hin tlaih dingin an kawl hna tiah an chim chih.
Relchap:Yangon Ramthen, S.Okkalapa Penguk Zung cu August 22 lio ah bomb a puak i lunghrinh in tlaih mi volunteer Mg.San Win Aung (kum 19) cu SAC ralkap nih August 25 ah an thah i tangka sing 10 in aruak hlam ding chungkhar an thanh hna.
“Mg. San Win Aung hi volunteer in a um mi a si. Hi bomb puahnak he zeihmanh aa pehtlailo. Amah hi S. Okkalapa Peng 10 Sang, Artawka lam 21 ah a um mi a si. Atu cu an thah i tangka sing 10 in aruak an hlamter hna,” tiah amah he aa naihniam mi pakhat nih a chim.
August 23 lio ah Mg. San Win Aung hi SAC ralkap nih hringtu anu he tonnak nawl an pek. Upat pekta le a hnu bik siaherh biacah caan an pek mi zoh tik ah SAC nih tinh mi ngei tein an thah mi a si, tiah an zumh.
Ake le kut ah cincik in an khih. An velh tuk ca ah lam zong a kal kho ti lo. SAC ralkap nih cun, nan nu hi bia (upat pe) law a hnu bik biacah na duh mi chim ta, an ti i SAC ralkap nih Mg. San Win Aung hi tinh mi ngei tein an thah mi a si ko, tiah Sangmi nih an chim, tiah Khit Thit Media nih a tial.THT
Leave a Reply