Kawlram Cu Covid-19 Zawtnak Nih Faktuk In A Den Ching Lengmang Ko, Nihin Cu An Zualhma Khun

Covid-19 pulrai zawtnak nih faktuk in a den cuahmah mi vawlei cung ram tampi hna lakah Kawlram zong a zualhma chin lengmang ve ko cang. Kawlram a um mi nih cun cu hlan nak in kan I ralrin chin lengmang zong a herh. Tuzan lei ah Kawlram ngandam nak lei zung nih thawngthanh nak an tuah mi zoh tikah thinphan dailo a si chin lengmang ko cang.

2020 September 26 suimilaam 8:00PM i Ramkomh Ngandamnak le Zaanglek Zung nih a thanh ning ah zawtnak ngei hmuhchap mi minung 880 an si. Zawtnak in a dam i sii-inn in chuahter mi a thar minung 164, nihin tiang ah sii-inn in a chuak cang mi dihlak minung 2618 an si cang.

Cun, zawtnak in a thimi a thar minung 24, nihin tiang a thimi dihlak minung 198 an si cang. Zawtnak a ngei mi dihlak 9,991 an si cang tiah an langhter ning cu a si. Kan umnak hmun cio in ralrin zia kan thiam zong a herh.

Hi pulrai zawtnak hi tihtuk ding zong a si lo, asinain ralrin ngai cu a hau mi a si. Kan pawngkam ah pulrai zawtnak nih a phak mi hna an um tikah tihtuk le thinphang tuk in cun um hna hlah usih, asinain ralrin zia tu thiam ko hna usih.

 88 total views,  1 views today

This function has been disabled for Chin 11 News.