Kawl Ralkap Nih Thil Thar Tuah An Tim Hoi Cang!

Ralkap cozah nih Union Election Commission (UEC) a thar in dirh ding in timhtuahnak a ngei, tiah thawng kan theih.

Nihin February 2 ah ralkap nih anmah tein an ser tharmi ramkomh cozah bu meeting an tuah i UEC a thar ser ding in nawlngeihnak ramhtu Gen. Min Aung Hlaing nih biachimnak a ngeih lio ah a telh.

“UEC a thar in kan dirh lai i, November 2020 thimnak ah vote ningcang loin thlaknak a ummi pawl kan hlathlai lai. Mah hlan ah ralkap nih kan rak chuahmi vote cazin vialte kha ahmaanmi lawngte a si. Asinain, kha lio UEC nih zeihmanh a tuah lo. Ralkap nih peng/myone 314 chung i vote cazin pawl kan check dih. Felfai tein hlathlainak kan tuah hnu ah a herh ning in upadi ning in kan tawlrel lai,” tiah Min Aung Hlaing nih a chim.

Kawlram chung hmun kip ah hmatpungtin (NRC) a ngei lomi pawl zong hmatpungtin fawi tein hmu kho ding in tuahpiak kan i zuam lai, tiah a chim chap.

“Vote cazin pawl check nakding ca ah hmatpungttin le chungkhar cazin ahmaan a herh caah 2014 le 2019 lio i milurel cazin cherhchan in ttuanvo ngeitu zung hna nih tlamtling tein an tawlrel lai. Cun, kan ram ah hmatpungttin a ngei rih lomi tampi an um tiah kan theih. Abikin, tlangcung hmunhma ah hmatpungtin ngei lo an tam i cu hna nih cun fawi tein hmatpungtin an ngeih khawh nakhnga kan tawlrelpiak hna lai,” tiah a chim chap.

Nihin ralkap cozah bu tonnak ah thimnak tuah tthan nakding kong Min Aung Hlaing nih tam a chim lo.

“Thimnak tuah tthan nakding ca ah a herhmi milu cazin hmaan tein kan tuah lai” timi bia tlang khat lawng hi nihin a biachimnak a donghlei ah thimnak kong he a telhmi a si.