Kawl Ralkap Nih Rakhine Le Chin Miphun Pawl Bomb Hmang In An Thah Hna

Kawl ralkap pawl nih Rakhine ram le Chin ram chung ah hriamtlai phu le khuami hna thleidan nak ngei loin bomb hmang in an thah lengmang mi hna chung ah hngakchia le nu zong tampi an nunnak a liam cang tiah Nuhrin Covo phu a si mi Amnesty International nih nizan cacawn nithum ni (Wednesday) ah khan thawngzamh an chuah.

March thla le April thla chung ah minung nunak a liam mi hi an tamtuk kong ah ah a bik in Chin ramchung ah Bomb in an kah lengmang mi hna ruang a si ko ti a langhter cu tehte thar pakhat zong a si tiin Amnesty International nih cun an langhter. Cun a thi mi hna chung in a tamdeuh hi cu Budish biaknak a bia mi hna pawl an si I Khrihfa pawl a thi mi hi cu mi tlawmdeuh an si, cun Rohingya pawl an thah mi hna zong a thar in kan theih than tiah Amnesty International nih cun an langhter.

Cun June thla thok in Internet phihkhar piak an si mi kong zong ah khuapi chung ah ralkap kut le hriamnam hmang in mi sawhsawh thah nawn nak a um le um lo UN lei nih kan hlathlai piak uh tiah zong Amnesty International nih UN sinah nawlpat nak an tuah fawn. Vawlei cung upadi ning in zoh tikah hriamtlai phu le mi sawhsawh thleidang loin kahdoh le thah nawn hi phungning lo a si I dantat nak nawl zong a um mi a si fawn.

Tulio hi Kawl ralkap pawl nih a luancia kum 3 ah Rohingya pawl an abu ning in an rak thah mi hna kong ah Vawlei cung biaceih zung sangbik nih hlathlainak an tuah cuahmah lio zong a si. Asinain Kawl ralkap lei nih cun Rohingya hriamtlai pawl ARSA nih an kan kahdoh mi ruang ah kan lehrulh ve mi hna a si tiah an chim ve.

VOA

 193 total views,  1 views today

This function has been disabled for Chin 11 News.