Kawl Ralkap Le NLD Nih An Thluak In Vawlei Pi Hlen An Timh

NLD le ralkap nih an thluak hmang in vawlei pi tei an timh. NLD cozah le Kawl ralkap nih an thluak hmang in vawlei biaceih zung ICJ cu tei an timh.

Gambia ram nih ICJ ah Kawlram hruaitu Min Aung Hlaing, Suu Kyi, Htin Kyaw, Win Myint le Thein Sein taza a cuai hna. OIC ram pawl ai awh in taza a cuai hna caah vawlei pi hmai ah tazacuai a si.

Cu tikah Kawl ralkap le NLD party pawl nih an thluak an chuah mi cu ramchung kipi lamzawh in auter kha a si. Tihin ramchung mipi hi kan au ter hna lai. Suu Kyi kan dirpi ko tiah kan auter hna lai i vawlei pi hmai ah kan biachim a zalong kho deuh lai, kan biachim hmual a ngei deuh lai ti kha an ruah caah an nau le pawl cu khuakip le sang kip ah an auter hna. A ruah hlan ah Chin ramkulh Matupi, Falam le Mindat zong ah an nua le pawl an van auter colh hna lai.

Mah bantuk lamzawh in auter hi hlan lio ralkap nih an rak hmanmi hriamnam pakhat a si i a tu zong ah ralkap nih an hmanmi hriamnam pakhat a si. Cucu NLD pawl zong nih ralkap nawlcawn in an rak hun hman ve cang.

ICJ biaceih zung an kal hlan ah Min Aung Hlaing le Suu Kyi zong tha tein an i tong. An nau le khuaruat kho deuh timi pawl he zong an i tong. Zeitindah ICJ ah bia kan chim lai timi kha an i ceih mi a si ko caah tutan ICJ biaceih zung ahhin ralkap le NLD cu lungthin khat in an um ti kha  a fiang ko.

Kum 70 reng lo chung Thlang cung miphun a kan that tu le thangcho kho lo ding in a kan rialdip tu Kawl ralkap uknak  kan timi cu nihin ni ahcun NLD pawl he vawlei pi hmai ah hmunkhat ah thinlung khat i hmu in an tang tti cang. NLD le ralkap nih an nau le pawl hmang in vawlei pi hlen an timh ko cang.

 

 211 total views,  1 views today

This function has been disabled for Chin 11 News.