Kawl ralkap an sining hi zeimawzat ka theih. Aluancia Naakah le Kawl Ralkap an rak i kah lio kong kha ka mitthlam ah a hung lang. Ralram ahcun Ralkap pawl hi an i timhtuah ning a tha taktak. Hmunhma an theih lonak cu Map tha tein an i ken i an zoh zungzal.
Tutan ah Laitlang a cangmi pawl hi, Kawl ralkap nan doh tikah hin nan i ruah lotuk in thil a kal tawn lai. Hi tikah Dalaan lawng puh loin nanmah nih nan hngalh khawh tawk in thilsining theih rak i zuam uh. Ralram ahcun an tactic a tha tuk ve. Zei caah tiah kan ral hi kan tei hna a herh an ti ve caah tei an maa taktak. A herh an ti ahcun chunzan hlen in an kal kho. Cutluk cun aa zuammi an si ve.
Cun Ralkap nih An ral an doh hna ahhin an ral pawl an i relrem lo caan bak aa selmi an si. Cu caah ka fa le ka nau le hna Miphun kilvengtu nan si bantuk in nan ral pawl nakin a let in tei a maa deuh ding nan si. Zaan zongah mitku cim lo in nan ral kha tha tein nan vengzungzal a herh.
Ralvengtu nih a daithlan sual ahcun ral sunghnak lawng si loin minung tamtuk nunnak tiang a liam kho mi a si caah, ralring te le teima taktak in nan ral hi do hna u law, Teinak nan hmuh khawhnak hnga nan Miphun nih thla kan i cam piak zungzal hna. Pathian nih in kilveng zungzal hna seh.
Leave a Reply