Kanpa Pu Henry Van Thio Hi Leiba An Cawh Bia Asi Hnga Maw

By Aceu-Salai Sang Ceu Lian

Leiba an cawh caah a si hnga maw kan ti tikah zei leiba dah a ngeih timi biahalnak nih a zulh colh ding khi a fiang. Cucu zei leiba ko dah a si hnga? Leiba ka timi cu zeidang pi khi a silo. Tukum hi NLD nih cozah an ser kho ngaingai te hnga maw timi hi zumh cio a si. Cu tikah thutnak pakhat zong hi an caah a biapi tuk hringhran. Thutnak kong cu chia rih ko ning, Amah kanpa rengreng nihhin tukum MP cuh hi a huam taktak ko hnga maw ti ka ruat ngai. Cu kong cu tlawm tein ka vun com ta lai.

Kawlram phunghram ah President paoh Kawlmi, Vice-President paoh tlangmi tihi a umlo nain Prime Minister Uknak in rak ihruai lio chan ah U Nu ( Kawl ) nih Prime Minister a tuan i, nawl ngeihnak a pelte zong a um lomi President cu Shan Ramukchung Sao Shwe Thaik nih a tuan. Ne Win Chan le Than Shwe chan kha cu tial duh hlah usih. 2010 ah Democracy phung a pelpawi tein thimnak an kan tuahpiak than i USDP nih teinak an hmuh caah Cozah an rak tlaih. Culio ahcun Shanpa Sai Mauk Kham cu Vice-President an tuanter. Cun 2015 ah thimnak a um than i NLD nih a tei caah cozah an ser khawh ve. Cu ahcun kanpu Henry Van Thio bak ruah lo pi’n Vice-President ah an thim ko. Hi lio ahhin Chinmi kan ilawm dih. Buddish pawl le anmah NLD caah kum saupi a pum a pe cang mi upa pakhat hnih bel an rak zai pah. Cu zong ahcun tlangcung mi kip nih rak tanpi cio a si.

Hi a cunglei tuanbia kan zoh tikah Kawl nihhin anmah he aa tluk in an kan hmu kho bak lo. An kan thleidan peng ko, A zik ah an kan chia duh bak lo tihi fiang ngai in a lang. Cucaah tukum hi kanpu Henry Van Thio hi MP hmanh tling than sehlaw VP cu an pe ti lai lo timi a fianter ngai. VP dirhmun in dirhmun dangah vun ithial ding hi a caah a har ngaimi a si. A sikun ah ziahdah aa cuh duh than ne hnga? Cozah ser khawhnak caah MP seat khat te zong a biapi tuk. Cucaah a nih hi ruah loin VP a tuannak thawngin kan Chinram ahcun a limhang a um ngai cang i teinak a hmuh hrim lai ti an zumh caah, Cozah serkhawhnak dingah seat khat te zong a biapi tiah icuh dingin an fial caah aa cuh thannak a si lai timi ka zumh ngai. Phundang cun Cozah serkhawhnak caah MP dirhmun in leiba an cawh kan ti lai cu. Ka phan piak ngaimi pakhat a um!

VP dir hmun in MP dirhmun ah vun ichuah ding cu a si kho lai lo i khua an ruah piakmi cu a um ko lai dah. A si ahcun zei rian dah an khinh kun lai ti na zumh?

Kei cu သာသနာရေး ဝန်ကြီး (Minister of Cults and Religion ) maw pe sual hna laikaw ti ka phang ngai. Kawlte cu an zertuk i Nawlngeihnak a pelpawi zong a um lomi Vice-President hna tlangcungmi tuanter riangmang in Vawleipi hmai ah, Kan Kawlram ah Tlangmi le Rawnmi thleidannak a umtilo tiah thanh an hmang. Cubantuk cun “Minister of Cults and Religion” rian pek riangmang i Vawleipi hmai ah Biaknak zalawnnak a tamtuk cang, Thleidannak a umti lo tiah an thanh sual lai ka phang. A taktak ahcun Buddish a silomi Tlangmi nih TAO rian hmanh ngah a hartuk.

Ministry of Cults and Religion ( MCR ) cu zeidah a si i zeidah a tuan? MCR cu Kawlram chung a ummi biaknak vialte zohkhanhtu/tawlreltu caah an dirhmi a si. Biaknak kip nih biakinn sak an duh caan ah hmunhma a zohpiaktu cozah phungning in cohlan piaktu a si. Nain Buddish Biaknak lawng a zohkhanh, hmunhma an pek hna. Cozah nih Budget tam taktak a pek i, cu vialte cu Buddish Biaknak caah a hman dih. Nihin Chinram i Khrihfa Biakinn vialte hi MCR phungning ahcun dothlami pakhat hmanh a umlo ti tluk a si anti. Cun MCR Vuanci tuan ahcun duh zong duhlo zongah Buddish Phungki pawl he ikomh a hau. Buddish puai le laam kip ah itel a hau. Cucaah Khrihfa pakhat dirhmun in MCR Minister si ding cu zoh a chia taktak mi le ngaihchiat awk taktak rian pakhat a si. A taktak ahcun MCR hi Buddish lawng nih an herhmi a si. Biaknak dang paohpaoh nih kan herhmi Ministry a silo lawng siloin a huat bakin kan huatmi ministry a si. Hi Ministry ah Khrihfa mi nih vuanci an tuan sual citcet ahcun Khrihfa mi vialte limhang a zor dih lai. Belnang neh bantuk a si lai caah kanpa Pu Van Thio an khinh sual lai ka phang ngai.

 190 total views,  2 views today

This function has been disabled for Chin 11 News.