Kan Vuleipi Ah A Ngan Bik Mi Mei Tlang A Puak

Vawlei Cung Ah A Nganbik Mei Tlang A Puak

Pacific ocean chung ah ummi vawlei cung ah a nganbik meitlang cu zarhpini ah khan a puak tiah theih a si.
1984 in kum 40 a rauh hnu ah a voikhatnak a puah si tiah theih a si i awlei cung meitlang vialte lak ah a nganbik Mauna Loa meitlang cu Pacific ocean Hawaii tikulh cung ah a ummi a si.

Meitlang a puah ruang ah zaan ah van lei cu meikang bantuk in an sen i, meitlang puahnak ruang ah a luangmi lungti a lin ngaingaimi cu tikulh chungah cun an luang tiah theih a si.

Nihnih ni tiang ah cun inn le minung umnak sangchung tiang cu tihnung dirhmun a si lo caah, mi bawmchantu phu lei zong nih mah umnak cio in hmundang i thialding ah nawlchuahnak cathanh chuahmi a um rihlo tiah theih a si.

Relchap>>>>>SAC Nih An Cawkmi JF-17 Thunder A Chambaunak A Tam

SAC nih China le Pakistan ah an cawkmi raldohnak vanlawng JF-17 Thunder cu chambaunak tampi a ngei tiah SAC vanralkap lei hlatthlaitu hna nih an chim. A chung i electronic thilri vialte a tlaitu (control) Computer nih an kahnak ding hmun tuaktan aa palh lengmang ti a si. Zeidang a chambaunak zong a um len.

JF-17 Thunder he pehtlai in SAC vanralkap lei thiamsang hna nih an tuahremh khawh lomi buainak cu vanlawng seh (engine), vanlawng a pum (fuselage) le vanlawng caah a herhmi thilri dangdang hna cawknak kong a si.
JF-17 hi Pakistan ram i Aeronautical Complex le China ram i Chengdu Aerospace Corporation hna nih i bawm in an sermi a si. JF-17 sernak ah China sermi vanlawng thilri hna pin ah ramdang thilri zong an hman. A seh cu Russia ser Kalimov RD-93 a si i suimilam 700 chung lawng a deihmi a si.

A seh a ṭhat lo caah meng 10 rawng a zuan ah a khu cu an nak dih, cun ṭha tein Aerobatic Maneuver (tanglei ah rang taktak in zuan, mupi nih ar a cawi i a zuanhnawh bantuk khi) a tuah kho lo ti a si. Sangpiin a zuan tikah China nih an sermi a pum (fuselage/a thla le a mei tel lo) cu kehkuai/rawh an i tim. A chambau biknak cu a thla (wingtips) le hriamnam an bunhnak (hardpoints) a si tiah theih a si.

JF-17 cu a ti (oil) a dih a fawi i vanlei kahdohnak a tuah lioah a ti rawnpiak a hau phun khi a si. SAC vanralkap nih zuan pah in ti rawnpiaktu Tanker vanlawng an ngeih lo caah JF-17 hi a zuan pah in a ti rawn hau seh law an rawn kho lai lo tiah SAC vanralkap lei hlathlaitu hna nih cun an chim.
JF-17 ahhin Medium-range Ballistic Missile, Air-to-air Missile, 80 Millimeter Rocket, 240 Millimeter Rocket le Pond 500 a ritmi bomb bunh/hman khawh a si. Asinain cu bantuk hriamnam cu China sin in an cawk khawh lo caah Pakistan sinah a thli tein SAC nih an cawk tiah theih a si.

Cun nitlaklei ram hna sin in an cawk i JF-17 sernak an hmanmi electronic thilri hna cu SAC nih nawlngeihnak an lak hnuah cun an caw kho ti lo. EU nih SAC cu phihkharnak a tuah caah JF-17 he aa pehtlaimi electronic thilri hna an cawk khawh ti lonak a si. Cucaah tangka tampi dih in an cawkmi JF-17 cu SAC nih an duhning in an hmang kho lo tiah theih a si.

JF-17 a chambaunak zohfel dingin Pakistan in vanlawng lei thiamsang hna cu Myanmar ah a thli tein voihnih an kal cang tiah Indian Journalist minthang De Parjan Roy Chandree nih Economist Times ah a ṭial.
Myanmar ralkap nih JF-17 cawk dingin 2016 ah China he hnatlaknak an rak ngei cang i vawleicung ah JF-17 a caw hmasabik ram a si. JF-17 pakhat ah US Dollar nuai 25 a si. Cawk an timh zat cu 16 a si i 2018 ah 6 a phan. A tangmi 10 kong hi fiangin theih a si rih lo.
Salai CP Lian

Be the first to comment

Leave a Reply

Your email address will not be published.


*