Kan Pale Nihhin An Kan Tlaupi Lengmang E! Ngaihchia Taktak A Si!

Zasang Cinzah- Chin Ramkulh nih “Luatnak Lungphun” an bunhmi hi zeibantuk in “luatnak” dah a si e? Khawika indah kan luat? A luat bak rih lomi, “luatnak lungphun” cu zeidah a sullam a si?

Kawlram Independence era/ 1948 zoh tikah British Cozah nih kawl miphun hna he independence pek tti hi an rak duh bak lo. A ruang cu Kawl miphun nih an “hlen” hna lai. An “covo” an chuh hna lai. “Harnak” an pek hna lai timi an rak theih tuk. An rak phan bantuk tein “hlen” kan tong tak. Kum 60 reng Kawl Ralkap uknak tangah “oppressed/namneh” kan si. Nihin tiang kan “luat” kho rih lo.

India ram ah a tlami kan miphun vialte, Mizo, Minipur le Naga zong hi British Cozah nih an rak kan humhimnak, In-liner Permit kha thate in an nunter khawh caah an ram a hrim deuh. Indian kala pawl khi duh paoh in Mizoram ah an lut kho lo.

Chinmi kan pale lakah Kawl miphun he ifawnh a duhmi Pu VTM te pawl an rak thawng tuk i, 100 ah 💯 bak in Kawl uknak ah kan tla. Kawl miphun nih an kan chuhmi kan Covo, kan Ram, kan vawlei, kan nunphung, kan sinak vialte Nihin ah tling tein kan hmuh khawh rih hlan ah, zeitindah Luatnak lung cu an phun khawh?

Israel miphun nih Babylon sal an tang lio ah “zeitindah miphun dang Ram cun Pathian hla cu kan sak khawh lai” tiah an tingttang cu Uihliam Kung ah an rak bah. Cu ve bantuk in “Zeitindah Luatnak kan hmuh hlan ah “Luatnak lung” cu kan phun khawh lai” tiah ti ve ding kan si lio ah Luatnak lungphun cu, luat lo bu pi in an phun ko. Kan pale hi lam an kan tlau pi lengmang e— ngai chia tak a si.

 177 total views,  1 views today

This function has been disabled for Chin 11 News.