Kan Naunu Sui Hlei Tial Kong Ah Minthut In San-Dah-Piah Sawmnak Cathanh Chuah A Si Cang

Chin miphun cu ‘kan nunphung in kan thih ni le kan ruak a sunhlawih i conglaizawnh’ tiang aa tuahpiak mi, thihnak ai tuarpi mi le ai ngaichiatpi mi kan si. Asinain Malaysia in chuahsemnak Thantlang khua ah ruak vui ding in an rak tlunpi mi kan farnu Sui Hlei Tial ruak cu Thantlang peng huap Covid-19 Commitee nih Thantlang khua ah luhpi nak nawl le thlanhmun ah vuinak nawl pek loin Pu Thang Hrim sia zuatnak, Hakha lampi kam ah vuiter a si.

Cu hnu ah chungkhar le upa hna nawlnak ruang ah zantim le khuamng ah minung pali lawng thlan thialnak nawl in thialter an si. Atu bantuk in thlaanhmun ah vuiternak nawl pe loin kan nunphung he i kalh in hauleng vuiter asi mi cung ah vawlei cung hmunkip um Chin miphun dihlak kan ngaih a chia i kan lung a fak.

Kan hmunhma cia ah biakhiahnak a tuahtu le nawlngeitu hna nihkhuami le upa sinah ruahnak hal a um lo hlei ah nawlnak ngaihpiak lo as i tikah lung a fak khun. Hihi Chin miphun kan limhang, kan nunphung, le kan phung le lam upatpiak lo a si caah ramchung ramleng um Chin mi dihlak nih lungfahnak le duh lonak a phunphun in langhter cio a si.

Cucaah Thantlang Youth Association (TYA) le Thantlang Sianghleirun Chungkhar hrilhhawhnak in Chin ramkulh chung zatlang phu 16 nih Chin ramkulh cozah sin ah: thlanhmun ah ruak vuiter lo ding in kham a sinak kong ah zalong mi hlathlaitu phu ser ding le tuanvo ngeitu dantat nak ngeih ding, hmailei ah atu bantuk thil kan ton ti nahnga lo Covid-19 Committee ah khuami le zatlang phu tel ding, a mi kip nih Covid-19 phung zul in thlan hmunte ah i vui a si i atu bantuk thil a can ti nakhnga lo zohfelnak ngeih i zuam lengmang ding in hal a si.

Asinain cu halnak kan tuah mi cu Chin ramkulh cozah nih hmalaknak felfai a ngeih lo leng ah ruak vuinak a khamtu lei tang in dirpinak le palh sual mi a si tiah chimfiannak an tuah. Cucaah hmunkip kaakip um kan Chin miphun hawile Thantlang khuami tampi kan lung a tling hrimhrim lo.

Cucaah Ramkomh cozah sinah: ruak khamnak kong ah zalong mi hlathlaitu phu ser ding, tuanvo ngeitu dantatnak tuah ding, le cozah nih thil pakhat hmalaknak a tuah tika hmun um khuami teltumnak papeknak (Tch. peng huap Covid-19 Committee ah khuami telh ve, tbk) a ngeih khawh nak hnga min thut in duhnak langhter (Singature Campaign) hmang pehzulh in hal ding ah timhtuahnak kan ngei.

Kan hmun, kan ram chung ah dinnak a len i miphun limhang le nunphung i upatpiaknak a um chin khawh nakhnga upat mi nangmah zong hi duhnak langhternak ah “minthtunak” in na kan telpi ve naklai upatnak he kan in sawm.

Thantlang Youth Association (TYA)