Kan Lai Miphun Nih Ral Kan Tuk Lengmang Mi Nih Hin Zeidah A Chuahpi Te Lai

Luatnak or sungh cikceknak: Raltuk nak nih kan miphun caah zeidah a chuahpi te lai?
====
Zapi uar ngaimi pakhat nih kutke tling a ngei ti lomi miphun ralkap hna he an hmanthlak a tar i a ngaihchiatnak a chim pah in raltuk ngol bak lo ding le raltuknak caah phaisa tampi thawh chap ding a tial chih.

Amah cu a cawlcangh ka zoh tikah miphun dawtnak lungthin taktak a ngei ko timi cu kai fiang. Nain, raltuknak nih kan miphun damnak le luatnak a chuahpi kho taktak lai maw? Kutke ngeilo le nunnak a liammi mino zong an zor deuh lai maw, an i chap chin nak dah a si lai? timi khi ka tuaktan than.

Tuthla dih cun aana ting kum 2 a tling cg lai. Myanmar rampi dihlak ah khuapi myo 320 ning in ralkap kuttang an um rih. Yangon ah cun phangphang te hmanh an puah ngam lonak thla 2 leng a si cang. Palek sakhan hmai an kham tawnmi thirhri vialte zong an phoih than dih cang. Kawlrawn 95% cu an dai cang, aana an ting lomi khi a lo ko.

Chinram milu ting 5 kan um, nu an tam deuh caah pa dihlak hi ting 2 fai kan si lai. A dai bakmi Paletwa khi milu tam bik an si, anmah milu 50,000 zuh ahcun 150,000 kan tang. Tar le ngakchia zuh rih, mino cu 60,000 kan tang. Raltu kho ding mino 60,000 ah hin raltuk a ngamh taktakmi cu 20% hrawng an si hnga— cucu 12,000 hrawng lawng khi a taktak ralkap kan ngei kho. MAH ralkap khi meithal a tlaimi dihlak ting 4 leng an si. Hitluk kokek mansung tamnak rampi sipuazi khi an kut ah a um fawn.

Thantlang i ralkap 70 hmanh tei an har ning, khua lai ummi palek sakhan lak hmanh a har ning. Timit ah anmah lei 120 an ra i kanmah lei 300 leng kan si nain kan sakhan vialte an lak dih ning, Timit pawng lungpang bantuk tlangsangpi cung kan hmunhma tiang an kai hnawh i an kan chuh khawh ning, March 2022 ah Hakha -Zokhua-Tinam in Gangaw tiang ralkap 70 an ke in an kal i lam thluan um Hakha CDF sakhan vialte an cul dih ning, Kalay-Hakha voi 5 tiang an kal chukcho khawh ning vialte khi hmuh ko ah cun kan ral hi tei awk an tha maw timi fiang tein theih khawh asi ko. Thluak ah caw ek ai cawh belte ah cun phun dang a si i.

Dohthlennak hi tam deuh cu hlawh tling lo. Sungh ahcun nunnak a liam ciami le kutke ngei ti lomi an hmai khah a si lo. Nain tei kho hlei lo ahcun nunnak tam chin a liam, kutke ngeilo an karh chin. Tei hlei lo ahcun sungh cikcek khi a si. KNU khi fiang tuk in kan hmuh ko hna khi, an hotu lukawngpa nih zungzal daihnak NCA min a thutpi hna ahkhan a rak har tuk ve lai dakaw.

Syria le Sri Lanka um Tamil Tigers dohthlennak an sungh ning zong khi ruah phu an si.
Kei cu Yangon le Mandalay ah ral an thawh lo ahcun Laitlang ah meithal puah awk a si bak lo tiah voi tampi ka rak tial cang. Atu cu kan puah i cei lak kan tuar cang. Kan puah peng rih ahcun kan nunnak tam chin a liam lai, kutke ngeilo kan karh chin te lai. Nain, kan i ruahchanmi teinak le luatnak cu Chin mino dihlak nunnak vialte hmanh khi pek sisehlaw teinak lam khi a um bak lomi a si.

Kan tuar ning kan celh ti lo tikah kan pale nih kahdaihnak min an thut ve te lai. Mah ka bia hi a lungfim deuhmi Laimi kan pale nih an lungthli tein an thei dih ciami a si ko, nain an chim duh lo, tam deuh nih cun tei ding an zumh bak lo buin thihnak hmun kal ding ah kan mino an forh peng rih hna— aruang tampi a um len ve lai ta.

Be the first to comment

Leave a Reply

Your email address will not be published.


*