Kan Farnu Nih Mizoram Pumpi Tang 10 Exam Ah Pakatnak a lak!

Mizoram pumpi tang 10 camipuai (High School Leaving Certificate Examination 2020) ah Chinmi kan farnu Singokhai Chozah cu pakhatnak (First Position) a hmumi pathum lakah aa tel ve. Sisi tiah a mindin in kan auh.

Tuni ah Mizoram Board of School Education nih HSLC Results 2020 hi an thanh.

Mark 500 chungah mark 476 a hmuh, distinction in a ong, subject a dihlak tein Letter (Gondu) a hmuh dih.

Mark 476 a hmumi hi pathum an hun si, an pathum in an mark hmuhmi aa tluk dih caah topper pathum an um, tinak a hun si. An min biafaang kalning (alphabetical order) in an chiah hna caah asi.

Kan farnu hi Pu Thahe Chozah (Thantlang peng, Lailen khuami, Saiha um) fanu asi. Apa hi Nelly pa kan ti. Ram le miphun caah aa pumpe ngaingai tawnmi asi.

Mizoram pumpi ah HSLC camipuai a phimi hi thong 12 lengkai an si, cu chungah a cungbik (Topper) i um cu lung a hmui ngaingai.

Mizoram cu India pumpi ah cathiamnak leiin a sangbik 2nk (the second most literate state in India) an si. Ca an thiam ngaingai. Cu bantuk ram le hmun ah Chinmi kan farnu nih a sangbik hmun in a on khawh cu kan lawmhpi ngaingai.

Salai VLT

 146 total views,  1 views today

This function has been disabled for Chin 11 News.