Kalay Pengkulh Pawl Cafang An Cin Mi le A Theipar An Zun Mi Kong Ah Lungretheih Nak Le Harsat Nak An Tong Hna

Kalay peng ah fang a suak that thei nawn lo ruangah lothlo pawl an beidong zet thlang

Kalay peng le Laitlang ah 2015 kum ti lian hnu Laitlang in ti put a mal suatsi ruangah fur ah tidai an khawpkham nawn lo.

Tidai a mal ruangah a ha-ha te’n tidai an pe aw ih cumi kar te ah lei an let ih fang an phun. Tidai tam lai ahcun lei let theh in tidai in zarh khat sung an ciah ih leilung a hmin ti in thuan in an hrut. Leilung a hmin tikah hrampi pawl an rak thi ih fang in tla a thatpi.

Hmansehla tu ah ni 2,1 men ah fang an phun ruangah hrampi an thi man lo ih leng ah leilung tla a hmin man lo. Cun fang an vun phun theh cun midang fang phun hrih lo pawl tidai an kian tikah tidai khum cu khal sehla tidai khum ding an neih lo ruangah a lak ah hrampi har an rak kho.

Hrampi har kho hi lo tuan pawl a zonzai tertu bik cu an si. Fang kung a din sungah vei 2 rori fang har phawi a tul. Hrampi thatnak si an hmang nan a tha hnem ngaingai lo ih hlawh sawm ih minung ih phawih a tha sawn. Lo eka 3,4 hi tum khat fang har phawi ter man ah ting 5 hrawng an cem ih tum 2 phawiter a tul. Fang har phawi lole fang kung hi an karh ding zat an karh thei lo ih fang suak a mal ter.

Culawng si hrih lo. Leilung hmin lo ih fang an phun tik ah fang hi a tha thei ngaingai lo. Curuangah 2015 hlan ah kum khat ah dawm vei 1 maw vei 2 maw an vawrh a sile tu cun vei 3 tengteng dawm vawrh a tul. Dawm vawrh ah le a mal bik dawm phun 2 tal rawi an rawi theu. Cozah dawm lawng a sile leilung a siat thei si.

Curuangah lothlo pa in a lo ah 2015 hlan ai tu ah a fang suak a tam hman ah a cemliam a tamtuk tikah a hrang ah bangman a tang mal sawn.

Fang ih dawm an hmanmi minung harhdamnak hrangah a tha lo zet ih tha naa tivek tla a suak ter tiah sibawi pawl in an ti.

Laknak: Zalen-Chin EditionĀ