Kalay Leiah Thawngpang Tha Ngaingai Theih A Si!

Kalay ah Lamzawhtu Tlaihmi le Ralkap Tlaihmi Minung Thlennak an Tuah! April 3 ah Kalaymyo lamzawhtu hna le Myanmar ralhrang ralkap karlak ah tlaihmi minung thlennak an tuah, tiah thawng kan theih. Mipi lei ttuanvo ngeitu pakhat nih, “Ralkap nih tlaihmi minung kan i thleng hna lai tiah a kan hal zungzal.

Zinglei ah minung 2 an rak thlah. Cun, zaanlei ah minung 6 an thlah tthan hna. Nizan zong ah khan minung pakhat an thlah,” tiah a chim. Ralkap lei nih an tlaihmi minung 9 an thlah hna caah mipi lei zong nih minung 6 nihin ah an thlahpiak ve hna. Mipi nih an rak tlaihmi hna hi traffic police minung 5, palik 1 le Dalan 1 an si i, cu chung ah cun minung 6 nihin ah an thlah ve hna hi a si. Credit: The Chin Journal

Raltuk Tikah A Cang Dingmi: Raltuk timi hi Laimi bia ahcun kan hman ngai nain a taktak kan nunnak he kan ihlat tuk. Raltuknak a ngaingai in vun ton tikah zeidek kan lawh cio te hnga. CNA/F le Kawl ralkap hi biatak tein ikah tak hna sehlaw zeimawzat cu kan thi te lai, zeimawzat cu kan ihliam te lai , zeimawzat cu kan lungfah te lai le zeimawzat caan cu khuaci muihnak chungah kan um te lai.

Cun, na sen ah sen lawlaw, na nak ah nak lawlaw ti a um te lai. Kan Chinram innpa AA le Kawl ralkap biatak tein an ikah thawk hnu in Rakhine le Rakhine chungah Kawl ralkap lei a tangmi siloah thawngpang petu paoh cu an thah hna. “Tam ngai kan thah hna” tiin USA um Rakhine hruaitu pakhat nih a ka chimh bal.

Laimi chung zong ahhin Kawl ralkap he neihniam tein a pehtlaimi le riantuanti an um ve tik ah hi pawl a nunnak zong a liam kho ve te men– kan mah le kan mah kan si hoi le zeidek kan lawh te hnga. Abikin Laimi mirum tam deuh hi ralkap he pehtlaihnak zeimawzat an ngei tikah zeitin dek an si te hnga. Ral hna a thawh taktak ahcun Rakhine nak hmanh in Laimi chungah Kawl ralkap crony tam deuh um dawh si fawn tikah thihdar tum thawng atu le atu theih dawh phun in kan um.

Thihnak kong ahcun a lung a fah/a lungkuai fawi bik lei ah a tel vemi Chin miphun nih zeitindah raltuknak nih a chuahpi dingmi thihnak pawl hi a inntuar te hnga?. Ral a thawh taktak ahcun a mit a caw te lai, a thin a tawi te lai, a kut a sum te lai lo. Credit: Salai Z T Lian

Relchih bak Dingmi: February 1 thok in lungrethei in kan um cio. A caan ah kan lung a fak, a caan ah kan thin a hung. Kawlram i a tlungmi sual thalo nih tidai bang a rak um zirzermi kan thinlung kha tilet bang a thawhter. Rammi nunnak a zaza in a paam, kanmah naihniam hawikom le chungkhat nun a hung pam lebang hnu cun, kan kokek thinlung a chuak. Teirulcham in thah ve duhnak le an kan tuahtoning in tuahto ve duhnak thinlung a sang deuhdeuh.

Cu thil cu, kan hmurkaa in a lang. Kan tuahserhnak in zulhter colh kan duh. Hihi minung thluak, thisen le thinlung a umtu ning a si an timi kha a si. Kan mawh maw? Kan mawh lo. Cuti kan mawh lo kan ti liote ah cun, thisen chuah duhnak thinlung a sang deuhdeuh tawn ko. Cun luan kha a har ti lo.

Hi bantuk thinlung tilet bang a thawh caan ah hin, hruaitu fim le tleng lak in hruaitu khuakhannak zulh a herh. Mawngtu a ngei lomi sangphawlawngpi cu, tlang ah aa su lai. Mawngtu cu, hruaitu fim an si. Hruaitu fim nih a bia le a khuakhannak kha a theihpar a chia he a ttha (consequences) felfaite in cuai a thlai. Cu hnu ah a biakhiahnak a kalpi.

CNA/ F ka zumh hna. An der zong ah pumpak nakin an tthawng deuh. Lungfimte in khua an ruat tiah ka zumh. Chin miphun caah a ttha bik in khua an khan hrimhrim lai. Kengkung tiah an cawl lo tiin kan i zai sek mi khi ‘consequences’ tthate in kan hliah khawh lo bia a si ka zumh.

I tuk le i thah cu, fawite in biakhiah phung a si bal lo. Ramleng in aukhuan le forh cu, a fawite. Ramchung mi him deuhnak le a ttha deuhmi thil kha kan miphun ai a awhtu nih thong tam tuk dan in kan nakin khua an ruah deuh lai ti hi a ruah awk kan hngal ko hnga lo maw? Credit: Salai B Chan Khar