Kalay Kahdohnak Ah SAC Ralhrang 10 leng An Thi

Kalay Kahdohnak Ah SAC Ralhrang 10 leng An Thi

Kalay peng kahdohnak ah SAC ralkap 10 nak tlawm lo an thi
2022 August 9 – Sagaing ramṭhen, Kalay peng ah August 8 ah a chuakmi kahdohnak ah SAC ralkap 10 nak tlawm lo an thi tiah theih a si.

Kalay peng, Kyunchaung le Tayakone khua karlak chun sml 12:00pm hrawngah kahdohnak a chuah hi a si tiah PDF-Kalay hriamtlai pakhat nih People’s Spring ah chim.

SAC ralkap 20 hrawng an kal lioah mipi hriamtlai phufonh nih an bawh hna i an kah hna hi a si. SAC ralkap a tlawmbik 10 an thi, sml 1 leng kahdohnak a chuah hnuah mipi hriamtlai hna him tein an kir kho tiah a chim.

Cun, Tayakone khua pawng August 3 ah kahdohnak a rak fak. Cu kahdohnak ah SAC ralkap 15 hrawng an thi i tampi nih hliamhma an tuar tiah PDF-Kalay nih a rak thanh.

relchap>>>>>>KNU tlaihnak hmunhma July thla chungah kahdohnak voi 259 a chuak

2022 August 9 – KNU hmunhma chung 2022 July thla chungah KNLA, KNDO le SAC ralkap, BGF karlak ah kahdohnak voi 259 a chuak tiah KNU nih a thanh.


July thla chung kahdohnak ah SAC ralkap le BGF 386 an thi i 280 an i hliam. KNLA le KNDO hriamtlai lei in 12 an nunnak a liam i 26 an i hliam tiah a thanh.
SAC ralkap hriamngan le bomrap ruangah mipi 19 an thi i 26 hma an pu. SAC ralkap nih mipi inn 44 le biakinn 1 a hrawh tiah KNU cathanh ah aa tel.

Cu lengah, khuami 49 tlaih an tong i KNU battalion 1 hmunhma chungah mipi 94,768 le battalion 3 chungah mipi 61,898 himnak hmun ah an zaam tiah a langhter.

UN OCHA nih August 3 ah cathanh a chuah ning ahcun rampi uknak chuh a si hlan buainak ruangah mipi 346,000 an rak zaam i uknak chuh a si hnuah mipi 866,000 an zaam chap caah July 25 tiang innlo a zaamtakmi 1.2 million an lonh cang tiah a thanh.

Be the first to comment

Leave a Reply

Your email address will not be published.


*