Kahdohnak Caan A Sau I Kan Ralkap Pawl An Baa Tuk Ve Cang Ee

Timit lei kahdohnak a sau cang caah kan ralkap an thadi,an ba tuk nain miphun himnak ding kong an ruah ah thazaang thar la in an thlik le thisen um ek in suttung bang an dir tthan tawn.
Pakhat a ih ahcun pakhat nih ral a ven piak hau,tu hmaanthlak khi vun zoh hmanh,pakhat a it i,pakhat nih ral a ven piak,ralveng tu a ih ve tikah tu aa hngilh mi nih khin ral a ven piak ve te lai.
Hihi an thisen le thahri um ek fonh in Chinland ram caah an dirhmun a si ko.

Mah ti a ttuan an um lio ah fawituk in a langtlangin hei judge tu kan tam ngai rih. Kan miphun pi in ral thawh caan asi,mah le ti khawhnak lam cio in miphun caah ngol loin kal peng hna usih.

Thawngdang>>>>>>Aung San Suu Kyi Cu Kum 6 Thong Thlak Ding In Chappiak Ṭhan A Si Caah Kum 17 Thong A Tla Lai!

Rampi ruahnak petu Aung San Suu Kyi cu nawlngeihnak latu SAC nih kum 6 chung thong thlak ding in an chappiak ṭhan caah, thong a tlak ding kum dihlak cu kum 17 a a si lai.

Kum 76 a si cangmi Suu Kyi cu kum 11 thong thlak ding in biakhiahnak an tuahpiak a si hnu ah nihin August 15 ah sualkawlnak phun 4 in biakhiahnak an tuahpiak ṭhan. Sualkawlnak phun 4 ca ah kum 6 chung thong thlak ding in biaceih a si caah, thong a tlak ding kum dihlak cu kum 17 a si lai tinak a si.

SAC ralkap hruaitu general Min Aung Hlaing nih 2021, February 1 ah Myanmar rampi uknak cu a rak lak i, cu ni ah cun rampi ruahnak petu Daw Aung San Suu Kyi zong rak tlaih a si. Nihin Aug 15 ah Aung San Suu Kyi cu kum 17 thong tla ding in biakhiahnak an tuahpiak, tiah theih a si.

Relchap>>>>>August zarh hnihnak, Karenni ramkulh chung kahdohnak ah SAC ralkap 19 an thi i, Karenni ralkap phufonh lei in ralkap pakhat nunnak a liam ve, tiah KNDF nih cathanh an chuah. August 8 le August 9 ah Shiataw(ရှားတော) pengchung SAC ralkap le KA, KNDF phufonh kar cu voi li tiang kahdohnak a chuak, cu kahdohnak ah cun SAC ralkap lei 8 an thi, tiah KNDF nih an thanh.

Hpruso(ဖရူဆို) peng ah SAC ralkap khah-lah-yiah 531 le Karenni hriamtlai phufonh kar cu Aug 9 ah, suimilam 3 tluk hrawng kahdohnak a chuak i, cu kahdohnak ah cun Karenni ralkap lei in ralkap pakhat a nunnak liam, tiah theih a si.

August 9 ṭhiam ah, Demoso peng Sanpiah meng 6 khua ah SAC ralkap le KNDF battalion 9 kar kahdohnak a chuak i, SAC ralkap 5 an thi. Cu ni zaanlei ah cun Demoso palik sakhan cu KNDF nih luhhnawh in an kah ṭhan hna i, SAC ralkap lei a thimi an um, tiah an thanh. August 12 ah Ruphaekhu(ရူဖယ်ခူ) sang Baptist Biakinn pawng ah kahdohnak a chuak i, SAC ralkap pakhat a thi, tiah theih a si.

SAC ralkap hna nih kahdohnak a chuahnak khua pawng um mi khuami hna cu ralphaw ah an tlaih hna. Cupinah Loilinlay(လွိုင်လင်လေး) peng, Dawpapah(ဒေါပါပ) khua cu SAC ralkap nih vanlei in an kah caah tualchung mi pakhat a nunnak a liam i, 2 nih hliamhma an tuar, tiah KNDF nih cathanh an chuah.Crd… The Chin Post

Be the first to comment

Leave a Reply

Your email address will not be published.


*