Kahdohnak A Linsa Thluhmah Cang, Voi 35 Kahdohnak Ah Ralhrang 40 Leng An Thi Ee, Mipi Ralkap 2 An Thi Ve

Kahdohnak A Linsa Thluhmah Cang, Voi 35 Kahdohnak Ah Ralhrang 40 Leng An Thi Ee, Mipi Ralkap 2 An Thi Ve

Febuary Thla Chung Karenni Peng Ah Kahdohnak Voi 35 A Chuak; Ralhrang 40 Leng Thi KNDF Ralkap 2 An Thi
=======
2023|Vaute 5| Febuary thla chung Karenni (Karen) peng chungah ralhrang le Karenni Nationalities Defense Force- KNDF karlah kahdohnak voi 35 a chuak, cu chungah ralhrang lei 45 an thi hriamnam zun 34 kan lak khawh tiah KNDF nih March 4 ah thawngthanhnak an tuah.

Hi thlakhat chung kahdohnak ah KNDF ralkap lei in minung 2 nih ram caah nunnak an pek i ralhrang hriam ngan kah mi nih ngakchia telh in mipi lei 8 an thi i minung 12 hliam an tuar. Mah pin ah inn 9, sii peknak inn 1 le Biaknak lei inn 4 a rawk tiah an langh ter.

Febuary thla chung thiam ah De-moh-soe khua, Pha-yu-soe, Lwe-kaw, Phe-khung khua hna ah ralhrang nih vanlawng in 6 a kah hna tiah kan theih. (Ref; TachileikNewsAgency)

Thawngdang>>>>>Facebook Chungah PDF He Hawikom Nan Si Ti Ruang Ah Asho Chin Nu Ralhrang Nih An Tlaih
========
2023|Vaute 4| Magway ramthen Ngaphe peng, Tungkyi khua um Asho Chin nu pakhat cu ralhrang nih Facebook chungah PDF he hawikom nan si tiin an tlaih tiah khua mi sin in theih a si.

Tlaih a tongmi nu hi kum 29 tluk a si i Mai Sein Sein Aye@ Mai Chan Sar timi a si, a mah cu Nga-phe khua ah rammi sinak hmat-pung-tin thlen dingin a kal pah ah ralhrang nih a phone an check i a tu bantuk sual puh in an tlaih hi a si.

“A u pa pakhat he an kal, a phone an check piak i PDF he hawikom nan si ti ruangah an tlaih hi a si, a mah cu Tungkyi khua ah dawr fate a tuah mi a si i a dawr zongah ralhrang hi thil an caw tawn. A u pa cu an thlah cang.”tiah khua mi nih an chim.

CDF-Asho Chin pakhat nih “ralhrang uknak hlan ah a mah he hawikom kan si. Facebook zong kan i Friend, cu tikah a facebook chungah ralthuam in ka hmanthlak an hmuh in an tlaih hi a si. An tlaih mi nu hi dothlennak zong ah aa tel mi a si lo pin ah bawmhnak tibantuk zong an kan pe bal fawn lo”tiah a chim.

Hi nu pakhat an tlaih hnu Febuary 28 le March 1 ni ah Koh-kyi khua um U Tun Tun Win le Salai Tin Ko Hla timi pa pahnih zong ralhrang nih an tlaih hna i Asho Chin nu telh in an tlaih mi hna cu Nga-phe palik sakhan ah an chiah hna tiah kan theih. (ref:Myaellatt Athan)