Kachin Ram Khrihfa Chungkhar Minung 5 Thahnak Kong Ah KIO Lei Thawngthanh Nak

Kachin ram chung Maan Si myone i KIA/KIO hmunhma chung ah chungkhar minung 5 thah an ton mi kong he pehtlai in lunghrinh mi minung 2 cu kan theih cang hna i KIO sakhan ah kan hren lio hna a si tiah KIO lei nih thawngthanh nak an tuah.

Hi kong he pehtlai in KIO inn biachim tu a si mi Buhmuci Naw Bo nih “nizan July 3 ah khan thah a tong mi chungkhar hna kong ah lunghrinh mi minung pahnih cu kan tleih cang hna. Bia hal nak zong kan ngeih cuah hma hna lio a si. Biahman cu an chim rih lo caah kan hren ko rih hna. Kan tleih mi hna zong hi anmah khua mi an si ko.

Bia hman a chuah khawh nak hnga ding ah bia zong kan hal cuahmah rih hna lai” tiah a chim hi a si. Hi chungkhar hna thah an tonnak hmun hi KIO hmunhma chung China ramri pawng ah a si, an chungkhar ning in zaan ah an rak thah mi hna a si i an fapa kum 13 te cu a rak zam manh.

KIO sakhan he meng 20 hrawng ai hlat nak hmun a si caah rianrang deuh in kan cawl kho lo bia le kan tawlrel khawh lo bia a si tiah zong KIO lei nih cun an chim hi a si. Thah a tong mi hna chungkhar 5 cu nizan July 3 ah khan Pastor te nih an ruak zong an vui cang hna.

DVB

 201 total views,  1 views today

This function has been disabled for Chin 11 News.