KA FAPA NUPI CAAH KANAN MINU CU KA DUH HNA LO”

Abraham chan lio ahcun fapa le nupi hi nu le pa nih tuahtanpiak deuh a rak si. Kanan ram ah an um ko nain a fapa Isak caah Kannan minu cu tthit ka duh hna lo tiah Abraham nih a ti (Gen. 24: 3). Zeicadah Kanan minu cu Isak caah a duh hna hnga lo?

1. SIASAL BIAMI AN SI: – A fapa ngeihchunh Isak, a roco pitu caah cun siasal a biami Kanan minu cu Abraham nih a duh hna lo. Baal siasal hmai i a laammi miphun cu a duh hna lo. Isak nih Jesuh hi hmun tampi ah a hmuhsak caah Jesuh roco pitu ding, Khrih i a mo si ding ahcun Pathian nih siasal biami cu a duh ve hna lo. Siasal biami nihcun Pathian pennaak co khawh asi lo (1 Kor. 6: 9).

2. CHIATSERHMI MIPHUN AN SI:- Kanan cu Noah fapa hniang Ham i a fapa a si. Ham cu a pa, Noah, cungah sualnaak a tuahtu kha asi. Noah nih Kanan cu chiat a serhmi asi. Cucaah Kanan nih a hrinmi miphun, Kanan miphun vialte, cu Pathian chiatserhnaak tang ah a ummi an si. Cucaah Abraham nih chiatserhmi miphun cu a fapa Isak nupi caah a duh hna lo. Isak nihcun Jesuh Khrih kha a hmusak caah Jesuh Khrih i a roco pi hawi ca zong ahhin zumlotu, Adam ah chiatserhnaak ai hrawmmi minung vialte cu Pathian nih a duh hna lo. Chiatserhnaak chung in a luatmi lawng nih Khrih roco pitu sinaak cu hmuh khawh asi.

3. KANAN MIPHUN CU SAL SI DING IN CHIATSERH AN SI:- Noah nih Kanan chiat a serh ah khan a u le hna sal si ding in chiat a serh. Cucaah Kanan miphun cu sal si ding ah tinhmi miphun, sal phun an si (Gen. 9: 20-17). Cucaah Abraham nih Isak nupi caah Kanan minu cu a duh hna lo. Isak nunnak nihcun a ra laimi Khrih kong hi hmanthlaak in a kan chim chung bantukin Jesuh roco pitu si ding ah sual sal, Sehtan sal, chung in a luat rih lomi, luat zong ai tim hlei lomi, cu Pathian nih Khrih roco pitu ding caah ai tinhmi an si ve lo. Sualnaak nih a ukmi hna, sual ah a nuammi hna le Sehtan nih sal bantukin a duh poh in a hmanmi, Sehtan sal nihcun Khrih he roco tti khawh asi lo.

4. KANAN MIPHUN CU AN RAM IN TTHAWL DING MI MIPHUN AN SI:- Abraham tefa nih an co hlan ah Kanan Ram cu Kanan miphun hna nih an rak comi ram a rak si. Asinain Pathian nih Kanan miphun cu hlohtlau dih a timh hna. An ram kha chuh i Abraham le a tefa hna kha zungzal in peek a timh hna (Gen. 12). Cucaah Isak nih Kanan minu a tthit ahcun Kanan ram cu Abraham tefa le Kanan nu fale nih an co ding khi asi hnga. Cucaah Isak ca i Kanan minu an tthit ahcun Pathian le Abraham karlak ah biahrennaak (covenant) kha Abraham nih a hrawh asi hnga. Pathian nih a ven pengmi cu a biahennaak kha asi. Sehtan sal chung in a luat mi hna lawnglawng hi Jesuh roco pitu caah Pathian nih bia a kan hrenmi cu kan si ve.

5. PATHIAN NIH HNULEI AH A CHITMI MIPHUN AN SI:- Joshua chan lio i Kanan ram khua pakhat hnu pakhat an rak tuk lio ah khan Pathian nih Kanan miphun hna cu ral an sunh nak ding bakin khua a khan. Israel miphun cu a ttanh hna i Kanan miphun cu an thih zong kha a poi ah a chia lem lo. Pathian nih hnulei ah a chitmi miphun an si caah cubantuk miphun cu Abraham nih Isak roco pitu ding caah a duh hna lo. Cubantuk ve in Khrih roco pitu ca ding ah Pathian nih hnulei ah a chitmi, zumlotu, hell ah a lotlau dingmi cu a kan duhmi asi ve lo. Pathian he ai kom i, Pathian a duh i, Pathian nih a umpi mi, Pathian nih thluachuah a peekmi zumtu ttha hna lawnglawng kha Jesuh roco pitu ding caah cun Pathian nih ai tinhmi hna cu an si. Catialtu: Aung Myint Thang

Note: Hmanthlak Hi Cu A Fian Deuhnak Dingah Google Ta Ka Van Tarnak A Si!