Ka Cauk A Chuak Dengmang Cang! Lawmh A Um Tuk Ee!

KA CABU A SUAK ZIK THLANG: Ngan loih ka um thei lo ruangah ka kum 13 ihsin ca ka rak ngan thok. Cumi hrangih ka co mi cu kawknak, relsiatnak, zokzetnak le nautat tuarnak men lawng a rak si.

Ka thisen sungih cangvai nohno mi calai hrik pawl cu mai duhthu ih thah theih a si loih, Sersiamtui in rak retsak mi a si ruangah thinnatnak le mitthli tlaknak pawl cu pahtlangin, sumpai zawngih a hlawknak siar ding um lo cingin le, mai neih mi hman heukhau bet lam si hman sehla, ca cu ka rak ngan rero thotho ih.. tu cun kum 30 kiangkap a rak si man zo!

Cuvek dinhmun le boruak lakih rak kho mi ‘Pangpar’ ka si ruangah a si ding, cabu suah ding tla hi cu ka tum lo men lawng si loin a ttih in ka ttih thlohthlo. Harsa takih kan rak ngan mi ca, cabu in kan suah ih mipi hnenah hnek le hnon rero a vun tul ding le, sumzin hman ngah ban loih neihsun a riaral bet ding cu.. ruah men hmanah ka ngaingam hrimhrim lo.

Cuvek cu ka rak si ko nan, Pathianin tul a ti thlang hi cun kanmai lam tumnak um lo riai in, USA ih Calai Somdawl Pawlkom hmangin kum tampi sung mekazin phunphun ih ka rak ngan mi ‘Nunthuleng Tawi’ lawrkhawm cabu cu, a vei khatnak hrangah, suah dingin tawlrel a rung si tariai!

Cabu ka suah ding thu rualpi pawlin an theih tikah copy 500 lawng cu a mal tuk thu in sim celcel hai. Pawlkom in in pek zat len bu 500 hrang lawng a si fawn; ka suah tum zat suah thei ding cun ting hra lai a tul bet lala.

Cubetah ‘Tlangzarh Program’ tuah lo cu a cang thei lo, in ti celcel ih.. cunah khal paisa a tul thotho. Cutiasiruangah, ka cabu tha in pe duhtu nan um a si le tiah order ka run la a si hi.

#Bu #khat #man ➡️ 2500 MMK. Ka cabu tha in pe duhtu cun in leisak zat ding kha in sim in paisa in kuat cia thei uhla ka lungawi zet ding.

Cun mipi hnenah dil duh mi ka nei: Nan khua hrangah bu 5, bu 10, tivekin nan leisak a si le (Hakha unau pawl bangin inn tin rori daih ih hlu thei ahcun a tha bik!) ca an siar ngenge ding. Curuangah nanmai hrang lawng si loin nan khua simaw, kawhhran simaw hrangah leih ceem dingin ka lo sawm duh a si. Cabu a lei duhtu cun comment lole inbox ah in rak sim hram uh.

Ka lungawi.
MUA: Blessing Nei
Photo: Roland Photography